COVALIMA, 15 Maiu 2024 (TATOLI) – Ai-moruk item 46 stockout iha Farmásia Saúde Covalima, tanba ne’e Servisu Munisipál Saúde submete ona pedidu ba parte nasionál atu responde kestaun ne’e.
Diretór Servisu Munisipál Saúde Covalima, Domingos Sequeira, informa tipu ai-moruk ne’ebé falta mak esensiál, la’ós esensiál no vitál. “Ita submete ona pedidu no agora ai-moruk mós iha nasionál ona. Atu rezolve laiha stock ai-moruk iha farmásia ho nia prosesu depende hato’o pedidu ho kategória hanesan pedidu normál, entaun nia prosesu kle’ur uitoan no pedidu emerjénsia, nia prosesu loron rua ka tolu husi nasionál bele responde kedan”, Domingos Sequeira dehan iha salaun Polo, ohin.
Domingos Sequeira realsa katak ho falta ai-moruk maka Servisu Saúde uza alternativa seluk hanesan medikamentu antibiótiku mak laiha, troka ho antibiótiku seluk no sei la fó impaktu ba ema, tanba médiku hatene oinsá atu fó reseita.
Responsavel ne’e salienta katak, bazeia ba regra normál, Farmásia Covalima baibain iha item ai-moruk 262, husi númeru ne’e 46 mak laiha ona.
Lista item ai-moruk stockout iha Farmásia Covalima mak Diclofenac tablet, Diclofenac, Salbutamol injeksi, Vitamin K1 injeksi, Aluminium tableta, Amciclaf Xarope, Azitromicin tableta 500mg, Beclometasone inhaler, Calimin lation, Captopril tableta 25 miligrama, Cefixim tableta, Clotrimazole vaginal, Diazepam tableta, Erytromicin tableta, Erytromicin xarope, Folic acid tablet, Gentamicin injeksi, Griceo fulvin tablet 500mg, Griceo fulvin miligrama 250.
Aleinde ne’e Hyoscine butylbromide tablet, Ibuprofen tablet, Ibuprofen xarope, Metronidazole tablet, Multi vitamin tablet, Multi vitamin xarope, Nalidixid asid tablet, Naphazoline eye drops, Prednisolone tablet 5mg, Prednisolone tablet miligram 20, Promethazine xarope, Tramadol tablet, Tramadol injeksi, Vitamin C tableta, Amocilin tablet, Disaclodyl tablet, Metaformin tablet, Hydrocholorothinzide tablet miligram 25 no Aspirin tablet.
Xefe Sentru Saúde Maucatar, Moises Gusmão, relata katak bainhira iha sentru saúde mak stock ai-moruk hotu, sira hato’o pedidu ba farmásia munisípiu no kuandu iha halo kedas distribuísaun, maibé laiha submete pedidu ba nasionál atu responde.
Daudaun ne’e, stock ai-moruk iha Sentru Saúde Maucatar sufisiente hela atu halo atendimentu ba pasiente sira bainhira bá konsulta iha sentru ne’e.
Jornalista: Celestina Teles
Editora: Maria Auxiliadora
