DILI, 07 novembru 2024 (TATOLI)–Ministériu Ensinu Superiór Siénsia no Kultura (MESSK) rejista ona estudante hamutuk 173 tama iha rejime espesiál asesu ba Universidade Nasionál Timor-Lorosa’e (UNTL) no Institutu Politékniku Betano (IPB).
“Profesór sira sei fó teste ba estudante sira iha semana rua mai tan. Agora ba sira-ne’ebé rejime jerál ne’e hein de’it Ministériu Edukasaun tanba sei hein valór ezame nasionál. Rejime espesiál ne’e hamutuk 173 no ohin ha’u foin simu informasaun husi Diretór Jerál,” Ministru Ensinu Superiór, Siénsia no Kultura, José Honório da Costa Pereira Jerónimo, informa iha Parlamentu Nasionál, kinta ne’e.
Notísia relevante : Estudante rejime espesiál 3.000 tuir ona teste atu asesu ba UNTL
Rejime espesiál sei tuir teste maibé rejime jerál hein ME bainhira fó lista mai katak sira ne’e mak pasa no haree ba valór di’ak bele tama UNTL ho IPB.
“Kona-ba hili fakuldade no departamentu sira-ne’e opsaun sira mak hili no ida-ne’e Ministériu fó ona ba sira, se ida-ne’e mak sira prense kritériu mak sira pasa,” nia akresenta.
Estudante sira maihusi munisípiu 13 ne’ebé mak ramata ona estudu iha tinan 2024 ba kraik.
Estudante ne’ebé tama ona rejime espesiál tenke tuir teste, enkuantu UNTL propoin fatin 4.000 ba rejime jerál ba IPB ho UNTL.
Jornalista : Osória Marques
Editora : Julia Chatarina
