COVALIMA, 07 Novembru 2024 (TATOLI) – Ministériu Saúde (MS) halo advokasia kona-ba Programa Planeamentu Familiár ho objetivu atu redús númeru taxa fertilidade ba inan isin-rua no bebé iha Covalima.
Koordenadora Programa Planeamentu Familiár, Agostinha Segurado, dehan atividade ne’e realiza atu família sira bele iha koñesimentu kona-ba benefísiu husi espasu oan ba tinan tolu, la’ós atu limita, maibé atu rekopera inan nia saúde, presiza fó atensaun ba labarik no fó biban ba inan ho nia katuas-oan bele sustenta ekonomia família nian.
“Kuaze taxa fertilidade aas, tanba Timór haree ba kultura, ema hotu presiza oan barak, maibé liga ba tema kampaña Planeamentu Familiár presiza fó espasu, nune’e oan sira bele sente inan-aman nia domin. Hafoin halo lansamentu ba kampaña Planeamentu Familiár iha nivel nasionál, ita kontinua halo advokasia iha nivel munisipál. Ohin, ita hahú uluk advokasia ba Programa Planeamentu Familiár iha munisípiu Covalima”, Agostinha Segurado dehan iha salaun AMC, ohin.
Atividade advokasia ne’e ho tema “Kontente ho espasu oan tinan tolu di’ak ba ita-nia komunidade, família nomós nasaun”. Programa ne’e oinsá atu hasa’e autoridade sira-nia koñesimentu no asesu ba informasaun liuhusi mídia.
Ministériu Saúde fó prioridade ba implementasaun programa ne’e iha munisípiu haat mak hanesan Ermera, Covalima, Bobonaro no Lautém, tanba taxa fertilidade aas no tuir relatóriu anuál, falta asesu ba Programa Planeamentu Familiár.
Tuir peskiza Demografia Saúde 2016, taxa fertilidade iha Timor-Leste 4,2% no bazeia ba sensus 2022, taxa referida tuun ba 3.0%.
Agostinha Segurado salienta katak MS realiza atividade ne’e bainhira simu orientasaun husi Primeiru-Ministru, Xanana Gusmão, ne’ebé husu ba Fundu Nasaun Unida ba Populasaun hanesan parseiru ba Ministériu Saúde atu fó prióridade ba Programa Planeamentu Familiár ne’ebé hetan apoiu mós husi igreja katólika.
Atividade planeamentu familiár ko’alia kona-ba responsabilidade ba ema hotu, liuliu sosiedade sivíl no autoridade-sira, tanba MS mesak labele atu atinje objetivu, nune’e nafatin kolabora ho parte relavante atu tulun iha implementasaun.
Iha sorin seluk, Sekretáriu Munisipál ba Asuntu Sosiál no Organizasaun, Filomeno Cardoso, dehan autoridade Covalima fó apoiu máximu ba programa Saúde nian kona-ba planeamentu familiár hodi fó espasu ba oan tinan tolu.
“Atu atinje objetivu, Ministériu Saúde implementa Programa Planeamentu Familiár no presiza halo advokasia hodi halo kampaña atu atrai inan foinsa’e sira iha baze, tanba sira seidauk iha koñesimentu”, nia afirma.
Notísia relevante: Planeamentu familiár importante hodi redús númeru mortalidade materna iha Timor-Leste
Jornalista: Celestina Teles
Editora: Maria Auxiliadora
