DILI, 30 novembru 2022 (TATOLI)—Organizasaun Mundiál Saúde (OMS) no Ministériu Saúde, kuarta ne’e, halo sorumutuk tékniku rejionál nível sudeste aziátiku kona-ba planeamentu família no kuidadu abortu kompreensivu hodi aselera redusaun mortalidade materna no bebé iha Timor-Leste.
Prezidente Repúblika (PR), José Ramos Horta, konsidera, kada família importante partisipa iha planeamanetu familiár.
“Planemanetu familiár ne’e importante tebes ba família hodi prevene moras kankru serviks, tanba moras ne’e grave tebes no feto barak mak sofre moras ne’e, maibé daudaun ne’e iha vasina ne’ebé bele halo prevensaun, tanba ne’e kada família tenke partisipa,” PR Horta, hateten iha nia diskursu bainhira halo abertura ba sorumutuk tékniku rejionál OMS sudeste aziátiku, iha salaun Rudal, Hudi-laran.
Iha fatin hanesan, Reprezentante OMS iha Timor-Leste, Arvind Mathur, hateten, atividade ne’e hanesan sorumutuk tékniku nível a’as dahuluk ne’ebé organiza hosi OMS iha Timor-Leste, ho tema relevante tanba konsidera katak saúde inan no oan nu’udar pilár rejionál ida hosi rejiaun OMS iha sudeste aziátiku.
Notísia relevante: OMS sei organiza sorumutuk rejionál kona-ba planeamentu familiár
“OMS iha kompromisu hodi haforsa polítika planeamentu familiár iha Timor-Leste hodi fornese servisu kona-ba planeamentu familiár ho maneira utiliza diferente métodu kontrasetivu ba família hodi prevene isin-rua la ho planu no armoniza família,” nia akresenta.
Rekomendasaun hosi OMS maka kada família presiza iha planu espasu ho durasaun tinan-tolu bainhira atu hetan oan tanba inan sira ne’ebé mate mai hosi nasaun sira ho rendimentu kiik no médiu ho númeru mate 94%.
“Ita tenke aselera esforsu atu hamenus mortalidade, ho sorumutuk tékniku rejionál ne’e bele halibur hamutuk péritu sira iha área planeamentu familiár iha plataforma ida atu fahe sira-nia prátika di’ak sira no halo planu ba oin atu hametin serbisu iha prosesu hamenus mortalidade inan iha rejiaun ne’e,” nia tenik.
Aleinde ne’e, importante mak fó formasaun ba profisionál saúde hodi mellora koñesimentu kona-ba prestasaun servisu iha saúde, ne’ebé prinsipál liu atendimentu ba planeamentu familiár.
Nune’e mós, Ministra Saúde, Odete Maria Freitas Belo, hato’o apresiasaun kle’an ba OMS nia Gabinete Rejionál Sudeste Aziátiku ne’ebé organiza ona sorumutuk ne’e iha Timor-Leste.
“Planeamentu familiár no kuidadu ba abortu mak asuntu saúde públika ne’ebé importante tebes iha Timor-Leste. Ha’u fiar liuhosi sorumutuk ne’e ita bele apreende liután hosi diskusaun rejionál no globál kona-ba asuntu planeamentu familiár ne’e,” nia hateten.
Sorumutuk ne’e hala’o durante loron-tolu, ne’ebé partisipa hosi péritu OMS no parseiru xavi sira hosi nasaun sudeste aziátiku inklui Bangladesh, Bhutan, Índia, Indonézia, Maldives, Myanmar, Nepal, Sri Lanka, Tailándia no Timor-Leste.
Jornalista : Arminda Fonseca
Editora : Julia Chatarina
