DILI, 29 novembru 2022 (TATOLI)–Organizasaun Mundiál Saúde (OMS) hamutuk ho Ministériu Saúde (MS), sei realiza sorumuk rejionál kona-ba planeamentu familiár no kuidadu abortu ne’ebé komprensivu hodi aselera redusaun mortalidade inan.
Tuir Reprezentante OMS iha Timor-Leste, Arvin Mathur, intervensaun planeamentu familiár iha papél signifikante iha redusaun mortalidade inan no oan no uzu métodu kontraseptivu sira bele hamenus isin-rua ne’ebé la ho intensaun, liuhosi fó espasu no limita partu.
“Saúde inan no oan nu’udar pilár importante ida hosi pilár rejionál ualu OMS nian iha rejiaun Sudeste Aziátiku. OMS Timor-Leste iha onra atu sai hanesan uma-na’in ba sorumutuk importante iha nasaun ne’e,” Arvind Mathur hateten liuhosi nota ne’ebé Agência Tatoli asesu hosi OMS, tersa ne’e.
Notísia relevante: MS lansa livru polítika nasionál ba planeamentu familiár
Reprezentante OMS dehan, sorumutuk rejionál ne’e hanesan sorumutuk tékniku nível a’as dahuluk ne’ebé sei organiza iha Timor-Leste, ne’ebé fó oportunidade di’ak ba Governu Timor-Leste no Ministériu Saúde atu hatudu susesu no fó sai kompromisu iha plataforma rejionál OMS nian.
Atividade ne’e sei hala’o iha loron 30 novembru no sei ramata iha 02 dezembru tinan ne’e, iha salaun Rodal Mahoka, Hudi-laran, ne’ebé sei loke hosi Prezidente Repúblika, José Ramos Horta.
Eventu ne’e sei partisipa hosi nasaun membru OMS hamutuk 10 hosi rejiaun Sudeste Aziátiku, inklui nasaun seluk hanesan Bangladesh, Butão, Koreia Norte, Índia, Maldivas, Myanmar, Nepal, Sri Lanka, Tailándia no Indonézia.
Eventu rejionál ne’e sei halibur péritu sira hosi nasaun membru sira hotu atu halo deliberasaun no halo revizaun ba servisu planeamentu familiár sira iha sira-nia nasaun no rejiaun, ne’ebé halo planu ida atu kobre nesesidade sira ne’ebé la konsege kobre no rezolve dezafiu sira iha futuru.
Tópiku sira hosi sesaun téknika ne’ebé planeia durante loron-tolu ne’e sei inklui progresu globál iha saúde seksuál no reprodutiva, progresu rejionál iha saúde inan no reprodutiva, instrumentu planeamentu familiár ne’ebé atualiza ona, intervensaun auto-care iha saúde seksuál reprodutiva no seluk tán.
Sorumutuk ne’e mós sei fornese plataforma ida ba nasaun membru sira atu hatudu materiál sira kona-ba sira-nia aprosimasaun advokásia, susesu no intervensaun sira seluk ne’ebé halo ona mudansa ba iha área planeamentu familiár.
Enkuantu, iha loron 01 dezembru, delegadu sira-ne’e sei hamutuk ho komunidade iha Timor-Leste hodi hala’o diskursu, liuhosi komemora loron mundiál ba HIV/SIDA no subliña importánsia hosi servisu planeamentu familiár ba feto no adolesente sira ne’ebé iha risku a’as ba HIV.
Jornalista : Antónia Gusmão
Editora : Julia Chatarina
