COVALIMA, 08 Novembru 2024 (TATOLI) – Autoridade Munisipál Covalima prevee $7.550 hodi komemora Loron Proklamasaun Independénsia ba da-49, iha 28 Novembru.
Prezidente komisaun organizadora, atuál Sekretáriu Asuntu Finansa, Alberto Moniz de Araújo, informa Covalima nia preparasaun foin mak forma komisaun organizadora no seksaun sira.
“Semana oin kada seksaun aprezenta sira-nia estimativa orsamentu hodi prepara ba komemorasaun Loron Proklamasaun Independénsia 28 Novembru iha Covalima”, Alberto de Araújo dehan iha AMC, ohin.
Orsamentu ne’e sei aloka ba postu administrativu hitu hamutuk $5.250, ne’ebé kada postu hetan $750, nune’e munisipál uza de’it $2.300 ba eventu ne’e.
Atividade ne’ebé sei hala’o mak Servisu Munisipál ba Jestaun Turizmu Covalima sei organiza feira, husu misa agradesimentu, tau ai-funan iha Monumentu Masakre Setembru Negro 1999 no halo animasaun.
Aleinde iha mós atividade korrida cavalo, ne’ebé nia orsamentu la’ós mai husi munisípiu, maibé husi Prezidente Repúblika no nia montante seidauk fixa.
Tema ba selebrasaun 28 Novembru mak “Orgullu ba ita-nia identidade no kultura, ita harii futuru liberdade, justisa no esperansa ba ita-nia Povu”.
Notísia relevante: Governu aprova tema prinsipál ba loron proklamasaun independénsia dala-49
Jornalista: Celestina Teles
Editora: Maria Auxiliadora
