DILI, 08 novembru 2024 (TATOLI)— Kooperasaun entre nasaun rua atu fortifika área ekonomia no turizmu ba futuru, nu’udar kestaun ne’ebé aborda entre governante nasaun rua – Austrália no Timor-Leste, liuhusi Vise-Primeiru Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay ho Ministra Asuntu Komérsiu Negósiu no Relasaun Ázia, iha sorumutu ida iha Dili.
“Timor-Leste ho Austrália tenke iha relasaun ne’ebé mak di’ak liu nune’e bele fortifika liután área ekonomia iha futuru mai,” Francisco Kalbuadi Lay informa ba jornalista sira hafoin hasoru malu ho autoridade Australiana, Hon Robyn Cahill OAM, iha Farol ohin.
Iha fatin hanesan, Ministra Asuntu Komérsiu, Negósiu no Relasaun Azia, Hon Robyn Cahill OAM énfaze mós kona-ba sorumutu ne’e no konsidera nu’udar onra boot ida ba nia tanba konsiente katak Governante timoroan, hatudu laran-di’ak tebes hodi fó nia tempu ba diskusaun di’ak sira ba relasaun no Kooperasaun Timor-Austrália Norte territóriu Austrália nian.
Hon Robyn Cahill OAM hato’o mós sentimentu Austrália katak “Governu Territoriu Norte kontente tebes atu halo relasaun ho Timor-Leste no ita hein hela oportunidade sira ne’ebé ita sei iha, iha tinan hirak oin mai atu ajuda ekonomia Timor-Leste no Territóriu Norte nian iha área Edukasaun, Negósiu no Turizmu”.
Ba oin, tuir Australiana ne’e, sei servisu hamutuk ho Governu Timor-Leste ba área sira ne’ebé mak iha benifísiu nune’e bele lori nasaun rua ne’e ba oin ho di’ak.
“Ami kontente tebes ho servisu ne’ebé ami bele halo hamutuk ho Governu Timor-Leste iha área sira ne’ebé temi no ami hein katak ita hamutuk sei fó benefísiu ida diak ba nasaun rua ne’e,” nia konklui.
Jornalista: Felicidade Ximenes
Editór: Rafael Ximenes de A. Belo
