COVALIMA, 09 Novembru 2024 (TATOLI) – Prezidente Autoridade Munisípiu (PAM) Covalima, Miguel Armada Cardoso, hamutuk ho nia estrutura divulga informasaun kona-ba polítika Governu ba implementa desentralizasaun administrativa ba populasaun iha postu administrativu Fatululik.
Autoridade ne’e dehan implementasaun polítika desentralizasaun administrativa konsagra ona iha konstituisaun RDTL nu’udar prosesu-ida transfere podér no responsabilidade husi administrasaun sentrál ba autoridade munisipál sira.
“Implementasaun polítika desentralizasaun ne’e, ita-nia Governu sentrál fó ona kompeténsia tolu hanesan desentraliza administrasaun, finansa no desentraliza patrimoniál”, Miguel Armada Cardoso dehan iha Fatululik.
Nia esplika katak, tuir dekretu-lei númeru 3/2016, loron 16 Marsu, ho redasaun aprovadu husi dekretu-lei númeru 84/2024 ko’alia kona-ba kompeténsia autoridade munisípiu Covalima nian.
Miguel Armada salienta katak desentralizasaun administrativa mak hanesan autoridade Covalima jere rasik nia orsamentu hodi implementa projetu ho valór $500 mai kraik, nomós jere rasik nia patrimóniu hanesan ema no rekursu sira seluk.
Administradór postu Fatululik, Elias da Cruz, reforsa katak prezensa PAM iha Fatululik atu konsolida povu ba dezenvolvimentu hodi kria lasu amizade ho líder komunitáriu iha baze hodi ko’alia kona-ba polítika Governu hodi realiza desentralizasaun administrativa.
Tabnba ne’e, PAM hakbesik bá komunidade atu lori dezenvolvimentu ba povu Covalima, liuliu ba povu iha postu Fatululik hodi ko’alia kona-ba polítika no programa Governu nian.
“Atu halo dezenvolvimentu ita presiza fó liman ba malu, nune’e Governu bele implementa programa ho d’iak, liuhusi ita-nia kontribuisaun”, dehan.
Postu administrativu Fatululik iha suku rua mak Fatululik no Taroman no iha aldeia ualu ho totál populasaun hamutuk 3.285.
Notísia relevante: PAM Covalima kompromete hadi’a estrada iha Fatululik
Jornalista: Celestina Teles
Editóra: Maria Auxiliadora
