DILI, 11 novembru 2024 (TATOLI)—Juventude sira hala’o atividade diskusaun grupu iha semináriu nasionál, iha ámbitu selebrasaun loron nasionál juventude ba dala-19 no loron Masakre Santa Cruz ba dala-33 (12 novembru 1991).
Ministru Juventude Desportu Arte no Kultura (MJDAK) interinu no atuál Sekretáriu Estadu Arte no Kultura, Jorge Soares Cristovão, konsidera, iha ámbitu loron juventude nasionál presiza valoriza martir sira.
“Loron juventude nasionál ida-ne’e atu valoriza ita-nia martir no eroi joven sira ne’ebé mak uluk luta maibé labele hamutuk ona ho ita, ita ukun rasik-an ida-ne’e joventude sira bele koopera malu no kontribui ba ita-nia país ida-ne’e ninia dezenvolvimentu ne’ebé sei la’o hela,” Ministru interinu hateten hafoin halo abertura ba semináriu nasionál iha ámbitu loron nasionál juventude 12 novembru, iha Sentru Konvensaun Dili (CCD, sigla portugés), segunda ne’e.
Governante ne’e parebeniza loron istóriku ne’e no hakruuk boot ba juventude loriku asu’wain sira ne’ebé mak ho atenbrani fo sira-nia vida tomak, ho prinsípiu ida de’it, luta ba libertasaun pátria ida-ne’e.
“Hodi Governu nia naran, hato’o parabéns ba selebrasaun loron nasionál ida-ne’ebé mak ita sei selebra iha aban,” nia akresenta.
MJDAK husu ba juventude jerasaun foun sira labele orgullu de’it ba juventude rezisténsia sira-nia luta iha pasadu maibé tenke valoriza.
“Ba alin joven sira, ita labele orgullu de’it mais ita tenkeser valoriza luta ida-ne’ebé mak ita-nia maun, ita-nia tio sira halo, tanba sira fó sira-nia vida tomak ba luta ida-ne’e . Ita valoriza la signifika ita tenke husu buat ruma iha ne’ebá, uluk sira ho kompromisu ida de’it, luta ba libertasaun pátria hodi ukun rasik-an, agora joven sira ita-nia papel importante hodi kontribui ba dezenvolvimentu ida-ne’e, luta ba ita-nia dezenvolvimentu ba rai ida-ne’e oinsá mak juventude bele kontribui ba luta dezenvolvimentu rai ida-ne’e ninia,” nia katak.
Notísia relevante : Loron Nasionál Juventude: “Orgullu ho ita-nia istória no hamutuk dezenvolve ita-nia nasaun”
Governu daudaun ne’e loke oportunidade barak ba joven sira, nune’e husu ba joven sira hotu atu kompete hodi bele kontribui ba dezenvolvimentu iha rai-laran.
“Ho ida-ne’e hakarak husu ba alin joven sira hotu, mai ita hotu haka’as-an atu estuda, atu apreende barak liután hodi bele kompete entre joven sira hotu, Governu fó oportunidade lubuk ida, liu-liu bolsa estudu sira-ne’e maibé la’ós naran fó de’it, maibé joven sira mak tenke esforsu hodi kompete nune’e bele hetan oportunidade. Husu ba juventude sira atu apreende barak liután, nafatin ativu iha diskusaun sira hanesan semináriu sira-ne’e hodi apoiu ita-nia nia nasaun no Governu atu luta ba dezenvolvimentu país ida-ne’e ninia,” Ministru interiunu fó hanoin.
Juventude rezisténsia sira fó an ba luta hodi ukun rasik-an nune’e jouventude jerasaun foun sira tenke hatutan nafatin luta ida-ne’e liuhusi kontribuisaun matenek.
Iha biban hanesan, Prezidente interinu Komité 12 Novembru, Filipe Rodrigues, hateten, jerasaun foun sira tenke orgullu no valoriza juventude rezisténsia sira-nia luta iha pasadu.
“Foin-sa’e sira tenke orgullu no apresia ho juventude rezisténsia sira-nia pasadu. Juventude sira agora tenke apreende barak atu sai di’ak liután iha tempu agora no tempu ne’ebé mai hodi dezenvolve ita-nia rai ida-ne’e ba oin tanba joven sira uluk prontu lakon vida tanba hakarak ukun rasik-an. Entaun, foin-sa’e sira hela atu kontinua sira-nia luta ida-ne’e ba oin,” nia dehan.
Nune’e mós, Prezidente Komisaun Nasionál Juventude Timor-Leste (CNJTL), Maria Dadi Soares Magno, hateten, juventude sira uluk ninia dedikasaun mak Timor-Leste ohin loron sai nu’udar nasaun ida-ne’ebé independente, tanba ne’e jerasaun foun sira tenke orgullu no valoriza luta ida-ne’e.
“Tanba ho sira-nia dedikasaun no sakrifísiu mak ohin loron ita konkista ita-nia independénsia no Timor-Leste sai nasaun Independente no soberanu, Estadu mós rekoñese katak luta juventude nia apoiu ne’e maioria, nune’e ita tenke orgullu no valoriza luta ida-ne’e,” nia tenik.
Komisaun organizadora ba loron nasionál 12 Novembru nia razaun realiza semináriu nasionál mak partisipante sira bele hatene luta ninia prosesu, nune’e mós juventude sira atu konsiente katak sira mak futuru nasaun ida-ne’e.
“Foin-sa’e sira, imi mak futuru, futuru ba família, futuru ba forsa traballu, futuru ba lideransa, tau ida-ne’e hodi kaer prinsípiu direitu umanu hodi aplika. Partisipa ativu hodi buka solusaun ba problema jerál sira, labele pasivu hodi haree injustisa, korrupsaun, abuzu poder, violénsia no krime, defende interrese nasaun, sai protogonista ba ita-nia dezenvolvimentu, mai ita hamutuk orgullu ho ita-nia istoria hamutuk ita dezenvolve ita-nia nasaun iha prósperu iha futuru,” nia enkoraja.
Partisipante semináriu nasionál, Jefarina da Costa, apresia no agradese ba juventude sira ne’ebé luta ba rai ida-ne’e, nune’e nu’udar joven sei banati tuir luta ne’ebé sira iha liuhusi halakon konflitu sira hodi kontribui ba dezenvolvimentu rai ida-ne’e.
“Apresia no agradese ba juventude sira ne’ebé uluk fó-an ba mate hodi liberta rai ida-ne’e, nu’udar joven sei nafatin la’o tuir luta ne’ebé sira iha hodi dezenvolve ita-nia rai ida-ne’e. Ita nafatin enkoraja malu, labele kria problema nune’e ita nafatin moris iha paz nia laran,” nia hato’o.
Jefarina da Costa rekomenda ba parte Governu atu loke kampu traballu iha Timor-Leste nune’e juventude sira nafatin serbisu iha rai-laran hodi dezenvolve rai ida-ne’e ba oin.
Jornalista : Osória Marques
Editora : Julia Chatarina
