DILI, 11 novembru 2024 (TATOLI)–Ministériu Edukasaun (ME) sei anúnsia rezultadu ezame nasionál iha loron 13 dezembru tinan ne’e.
“Ita sei halo prosesu korresaun ba matéria ezame nasionál tanba ita-nia totál estudante finalista ne’ebé tuir ona ezame nasionál hamutuk 55.611. Husi númeru ne’e Ensinu Báziku iha na’in-28.217, Ensinu Sekundáriu Jerál iha 23.6761, no Ensinu Sekundáriu Tékniku Vokasionál iha 3.733. Tanba ne’e, prosesu korresaun sei la’o hela, nune’e ita seidauk bele fó rezultadu estudante ne’ebé la tuir ezame,” Koordenadór Gabinete Unidade Kurríkulu Nasionál ME, João Maupelo, informa ba Agência Tatoli, iha ninia knaar fatin, Vila-Verde, segunda ne’e.
Aleinde ne’e, estudante hamutuk 141 partisipa ona ezame segunda xamada iha loron 05 to’o 08 novembru, kompostu husi Ensinu Báziku iha 41, ensinu sekundariu jerál 95 no Ensinu Tékniku Vokasionál hamutuk lima.
“Ita-nia estudante sira-ne’e tuir ezame segunda xamada tanba iha balun mak moras no iha balun ho razaun ne’ebé forte, entaun ita simu sira-nia razaun no rejistu ikus tuir ona ezame no prosesu korresaun mós la’o hela,” nia akresenta.
Notísia relevante : Estudante finalista 58.271 mak sei partisipa ezame nasionál iha loron 14 outubru
Ezame pasajen klase sei hahú iha iha loron 18 to’o 23 novembru tinan ne’e, ne’ebé kada eskola prepara no elabora matéria ezame.
“Ha’u hanoin kada eskola preparadu atu realiza ezame tanba kada tinan sempre iha no ezame pasajen klase ne’e hetan ona orientasaun husi Ministériu Edukasaun no Diretór Eskola sira hahú ona prepara ona pontu ezame no iha loron 18 novembru hahú ezame to’o 23 novembru, maibé CAFE realiza ezame ona,” nia dehan.
Iha sorin seluk, Diretór Servisu Edukasaun munisípiu Ainaro, Patrício da Costa Magno, hateten, eskola sira iha Ainaro preparadu simu ezame pasajen klase.
“Ami prepara ona pontu ezame ba pasajen klase nian tanba matéria ne’e ami Komisaun halo imprensaun ona no hein data realiza ezame ne’e,” nia tenik.
Jornalista : Osória Marques
Editora : Julia Chatarina
