Meza PN simu proposta alterasaun 73 iha debate espesialidade ba proposta OJE 2025
DILI, 11 outubru 2024 (TATOLI)—Meza Parlamentu Nasionál (PN) simu proposta alterasaun hamutuk 73 iha debate espesialidade ba proposta Orsamentu Jerál Estadu (OJE) 2025 ho montante billaun $2,6.
Notísia Relevante: PN aprova proposta OJE 2025 iha faze jeneralidade ho votu afavór 42
“Iha reuniaun plenária ohin, ita ba diskusaun no votasaun espesialidade proposta-lei OJE 2025. Nune’e, ha’u atu informa de’it ba Deputadu sira, dokumentu relativa ho proposta iha ona. Ita-boot sira-nia meza, lista proposta alterasaun ne’ebé esplika proposta admitida no la admitida. Iha balun, aprefeisoar proponente sira mak sei esplika, tanba iha proposta balun la identifika programa no sub-programa inklui totál alterasaun no laiha posibilidade tau hotu la admitida,” Prezidente Parlamentu Nasionál, Maria Fernanda Lay, fó sai iha sala plenária ba debate proposta OJE 2025 ba faze espesialidade ba loron dahuluk iha sala plenária, segunda ne’e.
Tuir lista proposta ne’ebé Agência TATOLI asesu iha proposta alterasaun hamutuk 73 ne’ebé aprezenta husi Deputadu husi bankada parlamentár sira, no proposta ne’e husu atu hasai no aumenta orsamentu no aloka fali ba programa, sub-programa no atividade seluk.
Enkuantu, tuir ajenda iha 11-25 novembru halo diskusaun ba proposta-lei OJE 2025 iha faze espesialidade.
Tuir matadalan ne’ebé iha diskusaun no votasaun iha espesialidade hahú iha kada artigu, númeru ou alinea no iha tabela orsamentál ho nia anexu iha proposta-lei OJE 2025, no bainhira iha proposta alterasaun mak sei halo uluk diskusaun no votasaun.
Baproposta alterasaun aprezenta to’o finál diskusaun no votasaun iha jeneralidade, ne’ebé ho nia giaun no presiza kumpre rekezitu ne’ebé iha, nune’e hodi orienta meza iha serbisu diskusaun no votasaun proposta alterasaun ne’ebé admitidu.
Iha proposta-lei númeru 12/VI(2a) Orsamentu Jerál Estadu (OJE) 2025 hahú husi nia Espozisaun Motivu, no nia iha artigu hamutuk sia (9), ne’ebé hahú husi Kapítulu I Dispozisaun Inisiál, artigu 1 Objetu no ámbitu, Kapítulu II Orsamentu Jerál Estadu, artigu 2 Aprovasaun tabela orsamentál, artigu 3 Impostu, taxa no kontribuisaun, artigu 4 Transferénsia Fundu Petrolíferu, artigu 5 Dívida Públika, artigu 6 Garantia, artigu 7 Transferénsia entre sub-setór.
Kapítulu III Orsamentu Seguransa Sosiál, artigu 8 Transferénsia saldu Seguransa Sosiál, Kapítulu, IV Dispozisaun Finál, artigu 9 Entrada em vigór no produsaun efeitu.
Tuir RPN, iha artigu 109.º (Diskusaun), iha alinea 1 hateten diskusaun iha espesialidade foka ba artigu ida-idak, la taka dalan ba buat ne’ebé previstu iha númeru tuir mai no aleina 2 mós haktuir katak, sei la iha diskusaun iha espesialidade ba artigu ida se la aprezenta proposta alterasaun ruma kona-ba artigu ne’e.
Nune’e bainhira ramata diskusaun ba proposta-lei OJE 2025 iha faze espesialidade mak kontinua kedas votasaun iha finál globál.
Tuir ajenda iha 26 novembru halo aprovasaun iha finál globál no iha 27 novembru komisaun C halo redasaun finál ba dekretu PN ne’ebé aprova OJE 2025, hafoin haruka ba Prezidente Repúblika (PR) mak iha kompeténsia eskluziva atu promulga
Enkuantu, iha loron 08 fulan novembru ne’e PN aprova proposta OJE 2025 iha faze jeneralidade ho votu afavór 42, kontra 0 no abstensaun 22 husi bankada FRETILIN ho PLP.
Jornalista : Nelson de Sousa
Editór : Cancio Ximenes
