DILI, 13 novembru 2024 (TATOLI) – Advogadu Privadu José Ximenes, hateten Ministériu Públiku mantein iha nia pozisaun hodi husu ba Supremu Tribunál Justisa hodi halo estradisaun ba Arnolfo Teves Jr hodi haruka fila fali ba nia nasaun orijen Filipina.
“Ita bo’ot sira hatene mosu nulilidade iha primeiru julgamentu ba produsaun prova tanba ne’e ita halo fila fali re-julgamentu ba kazu, ha’u-nia kliente iha loron 22, to’o dia 30 fulan-Outubru foin daudaun ne’e, haree fila fali produsaun prova sira liuhusi ne’e ita rona fali testamuña sira”, José Ximenes hateten ba jornalista iha nia kna’ar fatin Fomentu, kuarta ohin.
Nia dehan, iha rejulamentu ne’e Ministériu Públiku mantein ho nia alegasaun antes ne’e hodi husu ba Supremu Tribunál Justisa hasai desizaun hodi halo estradisaun ba fuzitivu Arnolfo Jr, tanba fatu sira ne’ebé durante iha julgamentu provadu katak Arnolfo Teves Jr komete krime iha nia nasaun orijen.
“Sira-nia pedidu husu atu estradita tanba dehan Filipina iha boa fé”, nia adianta.
José hateten, hanesan advogadu husu Supremu Tribunál Justisa atu rejeita pedidu Ministériu Públika ne’ebé atu halo estradisaun ba nia kliente Arnolfo Jr.
Antigu Prokuradór Jerál Repúblika salienta, sei kontesta alegasaun husi Ministériu Públiku tanba tuir ita-nia Konstituisaun RDTL artigu 35 númeru 2 la iha fatin atu estradita Teves fila fali ba nia rai orijen Filipina.
“Argumentu ne’ebé ami iha mak Filipina nia Konstituisaun sei kontinua rekoñese pena morte, Timor-Leste la rekoñese pena morte, signifika katak Timor-Leste labele admite hanesan país ida ne’ebé respeita vida umana, artigu 29 númeru 3 artigu 35 númeru 3 hanesan país ne’ebé respeita vida umana. Ita-nia konstituisaun la admite halo estradisaun ba kualker sidadaun ne’ebé iha nia pais sei koñese pena morte”, nia afirma.
Iha sorin seluk, Prevedór Direitus Humanu no Justisa Virgílio da Silva Guterres, hateten sé dezisaun Tribunál mak deside estradisaun ne’e dezisaun Tribunál nian no kompeténsia Estadu nian atu ezekuta ,
Nia dehan, maibé buat ne’ebé mak ita-nia konstituisaun no mós ho lei internasionál garante ne’e mak ita tenke hetan garantia husi Estadu orijen Filipina katak bainhira fila nia sei hetan julgamentu ne’ebé ke justu no mós pena ne’ebé ke nia hetan labele pena maiór ka prizaun perpetua no pena morte.
“Ida-ne’e ita tenke hetan garantia no ami hetan mós sondajen husi ami-nia parseiru sira iha Filipina husi Komisaun Direitu Umanu Filipina ninian, buat ne’ebé sira informa mai ami ne’e iha Filipina pena morte laiha tiha ona sira apaga tiha ona”, nia afirma.
Guterres afirma, depende ba dezisaun Tribunál Timor-Leste nian, karik deside, sé estradita duni Arnolfo, entaun tenke garante katak ema ne’e nia país orijen lahetan laiha duni pena morte ne’e laiha problema.
“Maibé kuandu se iha ne’ebé dehan pena morte ka prizaun perpetua sei vale ne’e ita labele estradita ne’e tanba ne’e kondisaun ne’ebé ke tuir ita-nia Konstitusaun no mós tuir ita-nia tratadu sira ne’ebé ita ratifika katak ita labele estradita sidadaun ida ba nia-nasaun bainhira nasaun ne’e aplika hela pena morte ka pena perpetua”, nia dehan.
Prevedór ne’e dehan iha fulan setembru fuzitivu Arnolfo Jr haruka karta ba PDHJ atu fó asisténsia ba nia tanba ne’e iha setembru foin daudaun, PDHJ halo konfirmasaun parseiru PDHJ nian iha Filipina hanesan Komisaun Direitu Umanu Filipina no Provedoria Direitu Umanu Filipina nian no sira informa katak Filipina agora la aplika ona pena morte.
Jornalista: Natalino Costa
Editór : Zezito Silva
