DILI, 13 novembru 2024 (TATOLI)–Deputada Bankada Opozisaun FRETILIN, Lídia Norberta dos Santos Martins, liuhusi diskusaun espesialidade ba proposta Orsamentu Jerál Estadu (OJE) 2025, hato’o proposta redusaun iha orsamentu Vise Primeiru-Ministru ba asuntu Sosiál, ho montante inisiál $1.100.000 hodi sosa ambulánsia no ekipamentu laboratóriu hodi halo teste ba produtu importasaun.
Deputadu Bankada FRETILIN aprezenta proposta tolu hodi husu halo redusaun $700.000 iha programa funsionamentu no dezenvolvimentu instituisionál iha títulu orsamentu Vise Primeiru-Ministru asuntu Sosiál hodi tau $200.000 ba fali Institutu Nasionál Saúde Públika Timor-Leste (INSPTL) hodi sosa ekipamentu laboratóriu no reajente toxikolojia hodi teste ai-han no bee hemu.
Aloka fali $300.000 ba Serbisu Nasionál Ambulánsia no Emerjénsia Médika iha programa kuidadu saúde sekundária no tersiária atu sosa aumenta ambulánsia tanba iha ospitál filiál no sentru saúde balun, iha povu barak mak kontinua halerik ba ambulánsia no $200.000 aloka fali ba Ministériu Juventude no Desportu iha programa inkluzaun hodi apoiu grupu joven sira.
“Redusaun ida ne’e haree Vise Primeiru-Ministru asuntu Sosiál, funsaun primeiru mak koordenasaun, tanba ne’e la presiza osan boot liu funsionamentu, Vise Primeiru-Ministru iha mós pasta ministeriál seluk atu aloka boot. Nesesidade krítika fó impaktu ba kualidade moris aloka fali osan impaktu sosiál no imediatu, alokasaun área saúde no INSPTL laiha laboratóriu iha duni nesesidade atu tau duni,” Deputada proponente Lídia Norberta, fundamenta iha debate proposta OJE 2025, faze espesialidade loron daruak, iha sala plenária PN, kuarta ne’e.
Notísia relevante : Orsamentu ba Vise-Primeiru-Ministru ba área Ekonomia rihun $400 aprovadu
Aleinde ne’e, akizasaun ekipamentu prevene risku saúde kontribui ba redusaun moras hanesan fuan, raan midar, asegura kualidade ai-han liuhusi teste laboratóriu inklui ambulánsia ba nesesidade presiza aumenta.
Iha biban hanesan, Deputadu Bankada FRETILIN, Antonino Bianco, aprezenta redusaun $110.467 ba bens no servisu iha programa funsionamentu no dezenvolvimentu instituisionál tanba iha tinan 2024 aloka $200.234 maibé la ezekuta no tinan oin husu aumenta.
Nune’e mós, Deputada Bankada FRETILIN, Nurima Ribeiro Alkatiri, haktuir, entidade relevante sira iha audénsia hato’o katak orsamentu la sufisiente atu sosa ambulánsia no harii laboratóriu, nune’e presiza apoiu orsamentu, tanba presiza laboratóriu atu kontrola sasán importasaun hodi bele hatene kualidade ai-han inklui kontrola produtu liu prazu, enkuantu ambulánsia ezistente la to’o atu kobre territóriu nasionál.
Deputada Bankada Governu CNRT, Lucia Taeki, hateten, tuir audénsia ne’ebé Komisaun F ne’ebé trata asuntu Saúde iha PN hala’o ho Ministériu Saúde (MS) no Serbisu Nasionál Ambulánsia no Emerjénsia Médika, nota katak iha tinan 2024 MS Servisu Nasionál Ambulánsia no Emerjénsia Médika sosa ona ambulansia lima no daudaun iha ona dalan, no iha tinan 2025 tau tan $300.000 atu sosa tan ambulánsia lima, nune’e konsidera proposta ne’e iha tendénsia atu sobu orsamentu vise Primeiru-Ministru asuntu Sosiál.
Deputada CNRT, Maria Gorumali Barreto, hato’o, Komisaun F ne’ebé trata asuntu Saúde iha PN nia relatóriu paréser hatudu katak iha problema rekursu umanu, tanba bainhira reajente no ekipamentu iha maibé rekursu umanu laiha ne’e maka sei la rezolve, nune’e Komisaun hato’o ona rekomendasaun ba Governu .
Hatan ba kestaun ne’e, Vise Primeiru-Ministru asuntu Sosiál, Mariano Assanami Sabino, konsidera proposta ne’e di’ak maibé fatin mak la loos tanba osamentu ne’e elabora bazeia ba programa, no haree ba ezekusaun daudaun ezekuta ona orsamentu 81%.
Nune’e, Gabinete Vise Primeiru-Ministru Koordenadór asuntu Sosiál koordena ho ministériu tutela hodi haree, hanesan laboratóriu dalaruma ladún koñese osan ne’ebé aloka la to’o ida,
“Se ita la hatene, ne iha ona ministériu tutela, no nu’udar Vise Primeiru-Ministru Koordenadór orienta gradualmente atu haree, tanba ne’e gradualmente ita tau tanba laboratóriu integradu, no kona-ba ambulánsia iha 15 multifunsaun sei dalan no lima sei mai ba asuntu juventude hanoin iha proposta OJE 2025 tau iha edukasaun, universidade, FDCH hodi haree ba joven sira, nune’e proposta sira ne’e aseita no husu atu proponente sira retira,” nia argumenta.
Hakat votasaun ba proposta númeru 44, ho rezultadu afavór rua , kontra 38, abstensaun haat no la vota 20.
Vitasaun ba proposta númeru 67, ho rezultadu votasaun afavór 17, kontra 38, abstensaun lima, nune’e proposta rua ne’e la pasa.
Orsamentu ba Vise Primeiru-Ministru ba área sosiál aprovadu
PN aprova proposta OJE 2025 ho montante $1.100.000 ho votu afavór, 42, kontra 20 no abstensaun rua.
“Orsamentu ba Vise Primeiru Ministru ba área sosiál pasa,’’ Prezidente Parlamentu Nasionál, Fernanda Lay, fó sai.
Proposta OJE 2025 Vise Primeiru-Ministru ba área sosiál prevee $1.100.000 hodi aloka ba saláriu no vensimentu $710.540 no bens no servisu $389.460.
Husi orsamentu ne’e aloka ba programa funsionamentu no dezenvolvimentu institusionál ho sub-programa rua no atividade tolu.
Jornalista : Nelson de Sousa
Editór : Cancio Ximenes
