DILI, 13 novembru 2024 (TATOLI)-Parlamentu Nasionál (PN) aprova proposta Orsamentu Jerál Estadu (OJE) 2025 ba Prezidénsia Konsellu Ministru (PCM, siglá portugés) ho montante $4.956.893, ho rezulltadu votu afavór 41, kontra 18 no abstensaun rua.
“Votasaun englobu iha tabela ne’e pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 iha faze espesialidade ba loron daruak, iha sala plenária PN, kuarta ne’e.
Orsamentu ne’e fahe ba kategoria saláriu no vensimentu $2.929.942 inklui bens no servisu $2.026.951 ba programa funsionamentu no dezenvolvimentu instituisionál ho sub-programa rua no atividade 10.
Notísia relevante : PCM ho entidade tutela aprezenta proposta OJE 2025 ba komisaun A
Programa polítika estratéjia nasionál ho sub-programa apoiu Primeiru-Ministru iha koordenasaun Governu no iha PCM ho nia atividade rua, sub-programa governasaun legál iha Konsellu Ministru ho atividade neen, sub-programa prestasaun serbisu tradusaun ho atividade haat, sub-programa polítika públika ho atividade rua, sub-programa efikásia ajuda esterna ho atividade rua, sub-programa koordenasaun projetu estratéjiku ho atividade rua, sub-programa komunikasaun estratéjika Governu no promosaun sidadania ho atividade haat.
Aleinde ne’e, sub-programa asuntu Parlamentár ho atividade tolu.
Jornalista : Nelson de Sousa
Editór : Cancio Ximenes
