DILI, 13 novembru 2024 (TATOLI) – Parlamentu Nasionál (PN), aprova proposta Orsamentu Jerál Estadu (OJE) 2025 ba Sekretaria Estadu Komunikasaun Sosiál (SEKOMS) iha faze espesialidade ho votu afavór 41 , kontra 18 no abstensaun rua (2).
Notísia relevante:https://tatoli.tl/2024/10/24/secoms-prevee-millaun-6-038-535-iha-oje-2025/
“Votasaun englobu iha tabela ne’e pasa ,’’ Prezidente Parlamentu Nasionál, Deputada Maria Fernanda Lay fó sai iha debate proposta OJE 2025 faze espesialidade ba loron daruak iha sala plenária PN, kuarta ne’e.
Proposta OJE 2025 Sekretaria Estadu Komunikasaun Sosiál (SEKOMS) prevee $ 6,038,535 hodi aloka ba saláriu no vensimentu $ 1,619,260, bens (sasán) no servisu $ 767,835, transferénsia públika $ 2,751,440, kapitál dezenvolvimentu rihun $900.
Husi orsamentu ne’e hodi finansia programa funsionamentu no dezenvolvimentu instituisionál ho sub-programa ida no atividade hitu.
No programa dezenvolvimentu setór komunikasaun sosiál ho sub-programa dezenvolve mekanizmu lejizlasaun, regulamentasaun no regulasaun ho nia atividade rua, sub-programa diversifika no fortalese meiu komunikasaun sosiál ho atividade ha’at, sub-programa kapasitasaun jornalista no fortalesimentu koezaun sosiál ho atividade lima, sub-programa superintendénsia no tutela órgaun komunikasaun sosiál Estadu ho atividade rua.
No ikus liu mak programa dezenvolvimentu sistema komunikasaun instituisionál Governu ho sub-programa desiminasaun informasaun ba públiku ho atividade haat, sub-programa dezenvolve sistema komunikasaun interna Governu ho atividade rua.
Jornalista: Nelson de Sousa
Editór: Cancio Ximenes
