DILI, 13 novembru 2024 (TATOLI) – Sekretáriu Estadu Formasaun Profisionál no Empregu (SEFOPE), Rogério Mendonça, promete iha tinan 2025 altera Lei Traballu númeru 4/2012, loron 21 fulan-fevereiru, hodi hadi’a lei saláriu mínimu ba traballadór sira.
Notísia relevante:https://tatoli.tl/2024/05/07/hasae-salariu-minimu-governu-tau-konsiderasaun/
Nia dehan, iha proposta Orsamentu Jerál Estadu (OJE) 2025, ba SEFOPE liuhusi programa funsionamentu no dezenvolvimentu prevee orsamentu hodi haree ba lejizlasaun sira hanesan alterasaun lei traballu, lei kontra asédiu mundu iha traballu ne’ebe prepara hela atu submete mai Konsellu Ministru.
“Iha Oitvavu Governu la halo alterasaun dekretu-lei saláriu mínimu, iha Governu da-sia lori duni mai Konsellu Ministru, maibé parte husi parte Ministériu Asuntu Kombatente Veteranu hato’o pontu balun, se ita aprova lei saláriu mínimu nia afeta kedas ba kustu insentivu, no saláriu míninu ita la kontrola presu sasán iha merkadu bele presu sa’e, ida-ne’e ami lori ona aprezenta Konsellu Ministru,’’Sekretáriu Estadu ko’alia asuntu ne’e hodi hatán ba deputadu sira iha debate proposta OJE 2025 ba SEFOPE iha faze espesialidade ba loron daruak iha sala plenária Parlamentu Nasionál (PN), kuarta ne’e.
Nune’e ba tinan oin SEFOPE sei fó prioridade hodi haree altera lei saláriu mínimu ne’e rasik.
Aleinde ne’e, SEFOPE mós haree lejizlasaun ba dekretu konsellu arbitrajen ne’ebé presiza diploma ministeriál pontu balun presiza revizaun , konvensaun organizasaun traballu liuliu idade mínimu liuliu labarik sira idade minoria fa’an sasán iha dalan presiza altera lei garante proteje labarik sira.
Iha debate ne’e, Deputadu FRETILIN, Antonino Bianco, hakarak hatene orsamentu SEFOPE ba tinan oin prevee atu produs lejizlasaun sira.
Deputadu CNRT, Natalino dos Santos, apresia SEFOPE tau prioridade ba preokupasaun traballador sira-nia atu atu halo alterasaun lei traballu, hanoin ida-ne’e durante sai preokupasaun ba saláriu mínimu liuliu preokupasaun sosiedade.
Deputadu CNRT, Ricardo Baptista, mós konsidera lejizlasaun ne’ebé SEFOPE atu haree hanoin ne’e importante tanba iha komisaun D trata asuntu Ekonomia no Dezenvolvimentu mós rekomenda ona tau atensaun ba lejizlasaun sira hanesan lejizlasaun atu proteje labarik minoridade fa’an sasán iha dalan ninin, tanba ohin loron ita hotu preokupa.
Jornalista: Nelson de Sousa
Editór: Cancio Ximenes
