iklan

EKONOMIA, POLÍTIKA

Hasa’e saláriu mínimu, Governu tau konsiderasaun

Hasa’e saláriu mínimu, Governu tau konsiderasaun

Vise-Ministru Asuntu Parlamentár, Adérito Hugo da Costa. Imajen Tatoli/

DILI, 07 maiu 2024 (TATOLI)-Vise Ministru ba asuntu Parlamentár, Adérito Hugo da Costa, hato’o katak Governu da-sia tau konsiderasaun kona-ba hasa’e saláriu mínimu iha Timor-Leste.

Notísia relevante:https://tatoli.tl/2024/04/30/reprezentante-povu-iha-pn-husu-governu-hasae-salariu-minimu/

‘’Relasiona ho sálariu mínimu ne’ebé foti, Governu da-sia liuhusi Konsellu Ministru hetan aprezentasaun inisiativa ne’e mai husi SEFOPE iha Vise-primeiru Ministru Koordenadór asuntu Ekonómiku nia tutela, iha aprezentasaun ikus iha fulan liu-bá,  husi apresiasaun no diskusaun analiza kle’an, inisiativa ne’e devolve ho konsiderasaun deputadu sira-nia ho públiku tomak,  konsellu nasionál  traballadór atu tau konsiderasaun ba pontu situasaun balun ne’ebé ohin loron iha  ita-nia planu orsamentu 2024 iha progresu implementasaun, kualkér introdusaun ba inisiativa ida ne’e iha dalan klaran ne’ebé ita-nia orsamentu projesaun kalkúlu orsamentu  nian tuir pontu bara-barak inklui mós sálariu mínimu,’’ Vise Ministru hato’o hodi responde preokupasaun deputadu sira-nia iha reuniaun plenária Parlamentu, tersa ne’e.

Konsiderasaun ba obra sira implementasaun orsamentu 2024 ne’ebé agora la’o hela mak Governu da-sia halo analiza no fó fila ba Sekretária Estadu Polítika Formasaun Profisionál no Empregu (SEFOPE) atu kontinua nafatin ho inisiativa ida-ne’e, maibé ita sei implementa momentu oportunu hodi labele afeta ba planu orsamentu ne’ebé iha progresu.

Portantu, konsidera, hanesan saida mak espresa husi deklarasaun bankada sira-nia nian nível sálariu mínimu ida agora $115 ne’e presiza atualiza ona ho situasaun atuál kustu vida ohin loron nian, Governu da-sia tau konsiderasaun no rekoñese pontu situasaun ida-ne’e.

“Maibé, implementasaun desizaun saida de’it liga ho kestaun orsamentu nian ita tenke halo duni analiza kle’an ba nia impaktu ba obra sira iha ein-progresu. No, konsidera mós informasaun sira mai husi setór privadu ho atu hasa’e saláriu mínimu ne’ebé afeta ba setór privadu. Rejista nafatin preokupasaun no opiniaun husi parte hotu no konsidera nesesidade atu aumenta saláriu mínimu husi $115 ba $150 tuir proposta, iha opinaun barak mós Governu simu mais $150, tan ne’e la’ós rejeita, ita kontinua sei halo analiza ba posibilidade senáriu saida mak ita atu implementa bainhira ita halo desizaun aumenta nível saláriu báziku ne’ebé la justu ona ho kustu vida ohin loron nian,’’ nia akresenta.

Deputadu FRETILIN, Antoninho Doutel Sarmento, liuhusi deklarasaun polítika iha reuniaun plenária ohin husu atu halo refelesaun hodi rekoñese katak traballadór nia kontribuisaun boot ba dezemvolvimentu ekonómia Timor-Leste nian, maibé déver no responsablidade ukun-na’in sira nian promove duni justisa no dignifika traballadór sira ka lae.

Sálariu mínimu traballaó Timor-Leste nian iha lei traballu númeru 4/2012 refleta prinsípiu fundamentál ne’ebé kontein iha Timor-Leste nia konstituisaun no reprezenta pasu importante ida ba dezenvolvimentu sistema relasaun laborál no administrasaun laborál iha TL ne’ebé justu no efetivu.

“Haree ba evolusaun ekonomia no sosiál ba nasaun ida-ne’e nian tinan ba tinan sa’e ba beibeik, tanba ne’e hakarak bolu atensaun ba Guvernu no empregadór sira atu konsidera traballadór timor-oan sira hodi regula no define saláriu mínimu ida ne’ebé tuir situasaun ekonomia atuál iha TL,’” nia hato’o.

Deputada CNRT, Cedelísia Farria dos Santos, hanoin saláriu mínimu ne’e tinan barak ona ita mantein ho $115 ida ne’e ita haree fali ba kustu vida sasán karun tebes, ne’eduni tempu ona atu hasa’e saláriu mínimu maibé labele sa’e liu kedas, nune’e iha tinan ne’e bele hasa’e ho neineik no tinan oin ita bele halo analiza fila-fali hodi hasa’e tan uituan.

Notísia relevante:KSTL: Traballadór serbisu to’o tinan-10 maibé saláriu nafatin $115 ne’e la justu

 Jornalista: Nelson de Sousa

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!