DILI, 30 abríl 2024 (TATOLI)—Reprezentante povu iha uma-fukun Parlamentu Nasional (PN) liuhusi Deputadu CNRT, Natalino dos Santos, husu Governu atu hasa’e saláriu mínimu ba traballadór iha rai-laran hodi dignifika liután moris traballadór sira-nia ho dignu.
Notísia Relevante: KSTL husu PN fó importánsia hasa’e saláriu mínimu ba $200
“Hakarak hato’o tempu to’o ona oinsá Governu atu haree kona-ba hasa’e saláriu mínimu, tanba ita haree ba kondisaun moris ne’ebé agora sasán karun, haree mundiál liuliu iha ekonómikamente presu sa’e. Nune’e, sai sakuat ida ba Governu atu revee fila-fali lei fó garantia di’ak ida ba ita-nia traballadór sira,” nia hateten ba Agência Tatoli iha resintu Parlamentu, iha ámbitu komemorasaun loron mundiál ba traballadór sira-ne’ebé mundu tomak sei komemora kada tinan iha loron 01 fulan-maiu, tersa ne’e.
Papél traballadór importante tebes ba nasaun hodi kontribui ba dezenvolvimentu iha setór hotu.
Governu atu hasa’e saláriu minimu depende ba Governu mak sukat ba Timor-Leste nia kresimentu ekonómiku ne’e oinsá, maibé hakarak ka lakohi saláriu mínimu ne’e tenke hasa’e duni.
“Tanba ita haree sasán karun, depois haree saláriu mínimu agora $115 ne’e kiik liu, Governu tenke haree ida-ne’e,” nia dehan.
Nune’e, tempu ona atu revee fali lei saláriu mínimu no hanesan Deputadu bainhira iha proposta alterasaun lei saláriu mínimu aprezenta iha órgaun lejislativa ne’e nia parte sei fó apoiu.
Iha parte seluk, Deputadu husi bankada Governu ne’e bolu antensaun ba Sekretáriu Estadu Formasaun Profisionál no Empregu (SEFOPE) liuhusi diresaun traballu atu kontrola di’ak liután hodi asegura direitu traballadór iha serbisu fatin labele hetan violasaun hanesan seguransa vida, ijéne no seluk tan.
Tanba, tuir nia, sei iha lamentasaun barak husi traballadór sira hasoru iha serbisu fatin hanesan serbisu liu oras laiha direitu hetan osan over time no problema sira seluk, tan ne’e SEFOPE liuhusi diresaun traballu presiza kontrola ka halo inspesaun másimu liután hodi proteje direitu traballadór labele hetan violasaun husi empregadór.
Deputada PLP, Maria Angelina Lopes Sarmento, hateten Governu persiza halo estudu ekonómiku no estudu viabilidade kona-ba hasa’e saláriu mínimu ba traballadór, hodi bele hatene sei laiha risku bainhira hasa’e saláriu ne´e.
Notísia Relevante: Tinan-ualu pendente, KSTL husu Governu halo revizaun saláriu mínimu $115
Tuir nia, saláriu mínimu ida agora $115 la sufisiente ba traballadór sira atu moris tanba vida karun, presu sasán iha merkadu aas tebes, nune’e tempu ona bele dignifika direitu saláriu ba traballadór sira.
Deputadu FRETILIN, Antónino Doutel Sarmento, hateten Governu presiza tau atensaun másimu fó kondisaun ba traballadór sira-nian, iha nivel saláriu ida-ne’ebé bele dezenvolve di’ak liután sira-nia vida moris.
Deputada PD, Maria Teresa Gusmão, konkorda traballadór iha Timor-Leste presiza moris ne’ebé dignu liuhusi atribui ba sira direitu ne’ebé tenke hetan nu’udar traballadór.
Traballadór la’ós de’it sira-ne’ebé serbisu iha Governu maibé jeralmente tantu iha empreza privada, sosiedade sívil no seluk tan, ema hotu bele tane aas sira-nia dignidade hodi hetan saláriu ida-ne’ebé másimu hodi sustenta sira-nia vida ho di’ak.
“Tanba agora sasán folin sae ba beibeik, saláriu kiik $115, sosa saida mak kotu. Ha’u hanoin ho vida ne’ebé karun ba beibeik nível saláriu ne’ebé sufisiente ba traballadór sira, mínimu liu tuir ha’u-nia espetativa mak $300 ne´e sufisiente, ida-ne’e kompara ho nasaun boot ne’ebé tau aas tebes dignidade traballadór sira-nia serbisu,” nia hateten.
Notísia Relevante: Governu propoin saláriu mínimu sa’e ba $135
Jornalista : Nelson de Sousa
Editór : Cancio Ximenes
