DILI, 11 dezembru 2023 (TATOLI)—Konfederasaun Sindikatu Timor-Leste (KSTL), segunda ne’e, hato’o karta petisaun ba Parlamentu Nasionál (PN) atu fó importánsia ba konvensaun kona-ba 190 Eliminasaun no Violénsia no asédiu iha mundu traballu no hasa’e saláriu mínimu ba traballadór sira ba $200.
Notísia Relevante: KNT propoin $150 iha revizaun Lei saláriu mínimu
“Atu dehan saláriu mínimu dignu loloos ne’e $200 ba leten, ne’e sufisiente ba traballadór nia moris, mai kraik ne’e labele. Maibé, tanba ita tetu hamutuk ho kapasidade empreggadór sira-nian, entaun ita foti dalan klaran $150. Kuandu bazeia ba peskiza ninia númeru ne’e la’ós hanesan ne’e, boot liu fali,” Prezidente KSTL, Almero Vila-Nova, hateten ba jornalista sira hafoin hato’o karta petisaun ba PN, iha uma fukun PN.
Nia hateten, ida-ne’e inflasaun tanba kapasidade atu absolve nesesidade loro-loron ne’e labele tanba sasán nia folin aas.
Nune’e, revizaun saláriu mínimu tenke hala’o hodi dignifika povu labele moris terus, tanba ne’e obrigasaun Governu nian atu kria saláriu dignu ba ninia povu no traballadór ho nia funsionáriu sira.
‘’KSTL nia preokupasaun la’ós ninia montante no la’ós atu sa’e ba hira. Importante saláriu ne’e bele duni dignifika traballadór nia moris ho dignu. Saláriu mínimu ne’e, ita ko’alia refere ba buat rua, ida inflasaun no persentajen kresimentu ekonomia nasaun. Ne’ebé, buat rua ne’e sai indikadór tetu ba saláriu mínimu,” nia dehan.
Kona-ba karta refere ba dokumentu konvensaun kona-ba 190 Eliminasaun no Violénsia no asediu iha mundu traballu no ezbosu saláriu mínimu, tanba iha komemorasaun loron 16 ativizmu foti tema rua mak ida ko’alia kona-ba halakon ka luta kontra violénsia bazeia ba jéneru,
Tanba, iha ambiente komemorasaun loron 16 ativizmu, organizasaun traballadór tau ida-ne’e kestaun ida hanesan importante tebes, tanba ba dahuluk konvensaun 190 ko’alia espesífiku violénsia bazeia ba jéneru iha mundu traballu.
“Durante ne’e laiha, ita ko’alia kona-ba violénsia bazeia ba jéneru ne’e jerál liu. Entaun, ida-ne’e ita hakarak promove konvensaun ne’e ba ema hotu-hotu iha Timor-Leste, atu entende didi’ak konvensaun ne’e,” nia hateten.
Daruak, hakarak luta ba igualidade renumerasaun haree situasaun ekonomia ohin loron feto sira barak mak simu renumerasaun mínimu tebe-tebes kompara ho mane, tanba bainhira ko’alia kona-ba jerál feto ho mane ne’e sofre hotu ba situasaun saláriu ohin loron.
“Ita haree iha setór públiku, ohin loron, funsionáriu sira mós manán ho $115. Mai fali setór privadu, traballadór sira serbisu ba kompañia sira mós hanesan. Iha nasaun seluk, kuandu Estadu no Governu la ratifika saláriu mínimu ne’e problema boot ba povu, tanba inflasaun no povu sofre ninia kapasidade kompara ne’e menus. Ne’e bele prejudika ba ninia situasaun ekonomia iha ninia família laran. Agora, ita Timor, ita-nia Governu sente hanesan baibain, la sente ema lubun ida iha kotuk manán $115. Ne’e molok nia simu nia saláriu, nia deve uluk tiha ona, nia simu mai taka fila-fali,” nia dehan.
Aleinde ne’e, nia dehan, violénsia doméstika ne’e mosu barak tanba problema uma laran ekonomia ne’e, ne’ebé hakarak kontra violénsia doméstika no kontra maluk feto sira ho dignu ita rezolve uluk mak sira-nia situasaun ekonomia ne’e.
“Ne’e mak saláriu, ita ko’alia kona-ba empregu la sufisiente kuandu saláriu ne’e la to’o. Ne’ebé, ema hotu-hotu iha direitu atu hetan serbisu, maibé hetan mós rendimentu dignu, atu nune’e traballadór ho ninia família ne’e bele moris dignu iha ninia família. Ne’ebé, ita husu Parlamentu Nasionál, hanesan uma fukun ba povu nian, entaun tenke sai lian no aspirasaun povu nian, Iha esperansa, tempu tuir mai PN bele konsidera dokumentu bele foti alternativa opsaun hodi kontinua rezolve situasaun povu nian ne’ebé ita hotu preokupa daudaun,”nia esplika.
Jornalista : Nelson de Sousa
Editór : Cancio Ximenes
