Parlamentu apresia operasaun ekipa konjunta ba kontrolu veíkulu Estadu
DILI, 26 Agostu 2026 (TATOLI)- Prezidente Komisaun C ba Asuntu Finansa Públika, Cedelízia Faria dos Santos, apresia ho operasaun ekipa husi konjunta Komisaun Anti-Korrupsaun (KAK), Diresaun-Jerál Patrimóniu Estadu, Diresaun Nasionál Transporte Terrestre, Komisaun Funsaun Públika no Polísia Tránzitu ba kontrola sirkulasaun veíkulu Estadu iha fin semana.
Nia dehan, operasaun konjunta ne’e mak medida di’ak husi Governu ho entidade relevante sira atu asegura utilizasaun patrimóniu Estadu tuir regra.
Tuir deputada, ho dekretu-lei foin kona-ba subsídiu transporte ba funsionáriu sira, servidór sira tenke uza subsídiu no labele uza veíkulu Estadu ba asuntu privadu.
Nia mós hatete katak, tuir lei, bainhira funsináriu halo serbisu iha fin semana, tenke iha orden serbisu. “Maibé, bainhira nia tama laiha orden traballu, uza de’it sasán sira ne’e, hanoin nia komete krime. Hakarak ka lakohi KAK no entidade relevante tenke foti atuasaun ba funsionáriu sira ne’ebé viola regra, sá tan [flagrante delitu]”, nia hato’o iha Parlamentu, ohin.
Deputada ne’e observa katak, maski funsionáriu sira simu ona subsídiu transporte, maibé barak kontinua utiliza veíkulu Estadu ba sirkulasaun livre iha fin semana.
“Entaun, nia sei fó impaktu ba osan manutensaun karreta, motorizada no kombustivel”, nia dehan.
Nia apoiu atuasaun ekipa konjunta ne’e no husu atu atividade hanesan kontinua hodi sensibiliza servidór Estadu sira atu utiliza patrimóniu Estadu ho loloos no responsabilidade.
Lembra katak Tribunál Judisiál Primeira Instánsia Dili (TJPID), iha kuarta ne’e, halo prosesu sumáriu ba arguidu na’in-neen, nu’udar funsionáriu Estadu ne’ebé lori veíkulu Estadu iha fin de semana foin lalais ne’e.
Iha prosesu sumáriu ne’e, Tribunál liuhusi Juíz Turnu José Escurial halo uluk produsaun ba prova sira, lee sai faktu ne’ebé arguidu sira halo no maioria husi arguidu fó depoimentu katak sira lori veíkulu Estadu sein guia de marsa husi sira-nia superiór.
Tanba ne’e mak autoridade seguransa sira halo apreensaun no detein arguidu sira ho flagrante delitu, nune’e arguidu sira tenke kumpre detensaun durante oras 72 nia laran.
Notísia relevante: https://tatoli.tl/2026/08/25/funsionariu-nain-neen-hetan-detensaun-tanba-lori-veikulu-estadu-iha-fim-semana/
Jornalista: Nelson de Sousa
Editora: Maria Auxiliadora
