Funsionáriu nai’n-neen hetan detensaun tanba lori veíkulu Estadu iha fim semana

DILI, 25 Agostu 2026 (TATOLI)–Ekipa konjunta Komisaun Antí-Korrupsaun (CAC, sigla portugés), Diresaun Nasionál Transporte Terrestre (DNTT), Komisaun Funsaun Públika (KFP) Polísia Tránzitu no Diresaun Jerál Jestaun Patrimóniu Estadu liuhusi operasaun ida detein funsionáriu Estadu na’in-neen tanba lori karreta no motór Estadu iha fim semana.

“Purtantu asaun ne’e halo iha dia 22 to’o dia 23 de Agostu tinan ne’e, halo iha lorokraik to’o kalan. Husi asaun auto-stop ne’ebé halo husi ekipa ida-ne’e, ita konsege detein karreta neen no motór 16. Ita mós detein suspeitu sira ka arguidu sira ne’ebé mak uitiliza sasán Estadu nian ne’e na’in-neen. Ne’ebé daudaun suspeitu sira ne’e hotu agora tahan hela iha sela CAC ninian iha kotuk ne’e,” Portavós Ekipa Konjunta no atuál Komisáriu Adjuntu CAC ba Invstigasaun, Alvaro Maria Fátima, hateten liuhusi konferénsia impresa ne’ebé halo iha edifísiu CAC, Farol, Tersa ne’e.

Nia dehan, prosesu ba suspeitu sira ne’e sei iha hela faze detensaun, nune’e orsida sei lori bá prosesu sumáriu.

Komisáriu Adjuntu ne’e haktuir, suspeitu sira nia hahalok ne’e konsidera pekulatu de uzu iha artigu 83 da lei númeru 7/2020. Kona-ba Medida Prevensaun Kombate Korrupsaun ida-ne’e nia pena ne’e bele hetan to’o tinan rua no bele aplika mós koima balun. Ne’e konfirma horsida Juíz turnu ne’ebé atende prosesu ne’e sei haree karik iha prejuízu ruma relasiona ho pekulatu de uzu ne’e.

Notísia relevante : Polísia Tránzitu nota servidór Estadu utiliza veíkulu Estadu tula oan ba eskola

Nia esplika, krime pekulatu de uzu ne’e la’ós aplika ba karreta de’it, mina Estadu ne’ebé tau hela iha karreta ne’e mós bele aplika maibé depende Juíz nia haree.

“Purtantu suspeitu sira-nia hahalok ne’e bele fó prejuízu Estadu ne’e rua, ida tanba uza sasán Estadu nian hanesan karreta ka motór depois uza mós mina. Mas ha’u hanoin prosesu ne’e mais tékniku liu Juíz sira mak sei haree iha sira-nia meza mak sei haree sira buat ne’e,” nia katak.

Alvaro afirma, asaun apreensaun ba utilizasaun veíkulu Estadu ne’e la’ós atu halo iha loron rua ne’e de’it para ona, maibé ekipa sei haree mós tempu oportunidade sira.

Nia dehan, operasaun ne’e sei la fó sai nia oráriu, sei realiza surpreza.

“Ekipa neen husi Estadu ohin ha’u temi ne’e sei halo nafatin asaun iha futuru kona-ba tempu no fatin ami mak hatene de’it, sei tun derrepente,” nia akresenta.

Ekipa konjunta bainhira halo apreensaun ba karreta no motór Estadu nota katak iha funsionáriu barak mak uza veíkulu Estadu sira  forade oras, serbisu laiha no karta autorizasaun husi superiór sira laiha.

“Balun halai lakon, rona ekipa halo operasaun para motór halai, tanba ne’e mak ami kaer de’it ema na’in-neen. Tanba ne’e Funsionáriu Públiku sira Ajente do Estadu ne’ebé mak utiliza karreta Estadu, motorizada Estadu para uza sasán Estadu ninian ne’e ho responsabilidade, signifika katak karreta sira ne’ebe mak iha pose kada funsionáriu nian liman ne’e sira bele uza, maibé sira tenke uza ba fins serbisu ninian,” Alvaro hato’o.

Labele uza veíkulu Estadu ba atividade privada

Biban ne’e, Portavós Ekipa Konjunta husu ba funsionáriu Estadu sira atu labele uza fali karreta no motorizada Estadu iha loron férias no ba atividade privada. Kuandu la kumpre mak konsidera viola pekulatu de uzu.

Nia husu ba funsionáriu no kargu xefia iha instituisaun Estadu atu uza karreta Estadu ba asuntu Estadu la’ós ba asuntu privadu.

Komisáriu observa, dalabarak funsionariu no kargu xefia la kumpre desizaun ne’e, tanba ne’e Ekipa Konjunta komprometidu asaun ho apreensaun ba karreta no motór ne’ebé sirkula iha fim de semana no bainhira laiha orden serbisu mak ekipa sei foti no halo prosesu.

Iha fatin hanesan, Komisáriu Adjuntu CAC ba asuntu Prevensaun, Rosário Salsinha Araújo, hateten, CAC halo ona atividade lubuk ida ne’ebé kobre ona funsionáriu balun liga ba prevensaun ho krime pekulatu de uzu, ne’ebé sira ne’e liga ba sasán Patrimóniu Estadu nian tomak.

Funsionáriu sira tenke toma responsablidade, liuliu disiplina atu uza sasán sira tanba poténsia bele fó prejuízu ba Estadu.

“Funsionáriu barak mak hakarak teste nafatin autoridade nia hakarak, tanba ne’e mak ha’u hanoin serbisu sira hanesan ne’e presiza koopera hamutuk, liuliu superior sira, ajente sira labele hatudu ezemplu sira hanesan ne’e tanba uza karreta tenke ho disiplina didi’ak,” nia reforsa.

Komisáriu Adjuntu ne’e nota, dalabarak funsionáriu atu halo sebisu maibé karreta laiha, enkuantu Xefe sira uza veíkulu ba asuntu privadu tuir nia vontade no gasta mina, ne’ebé bele fó prejuízu ba Estadu.

“Tanba ne’e mak disiplina ne’e hatuur nafatin, funsionáriu sira haree ona katak lubuk ida husi dirijente hetan subsídiu Governu ne’e hatene-an, labele arbiru uza sasán, di’ak liu lalika ba simu lori mai uma, hanesan mós lori sira bá-mai fali, ne’e lalika,” nia fó hanoin.

Nia husu ba kargu xefia sira, karik dadeer atu ba serbisu iha fatin idak-idak, buka maneira oinsá atu uza transporte privadu hodi, tanba veíkulu Estadu ne’e uza ba asuntu profisionál de’it.

Jornalista     : Natalino Costa

Editora         : Julia Chatarina