Alexandrino husu foinsa’e sira atu utiliza mídia sosiál ho responsabilidade
DILI, 26 Agostu 2026 (TATOLI) – Segundu Vise-Prezidente Parlamentu Nasionál, Alexandrino Afonso Nunes, husu ba foinsa’e sira atu utiliza mídia sosiál ho loloos no responsabilidade, liuliu iha tempu avansu teknolojia dijitál ne’ebé kontinua dezenvolve.
Nia hato’o mensajen ne’e bainhira halo abertura ba Edisaun Dalimak Parlamentu Foinsa’e 2026, ho tema “Liberdade Espresaun, Privasidade no Direitu Sidadaun nian”, iha sala plenária Parlamentu, ohin.
Deputadu ne’e realsa katak espansaun plataforma dijitál, liuliu Facebook, Instagram, WhatsApp, Youtube, no Tiktok permite demokratizasaun no universializasaun ba liberdade espresaun, inklui asesu ba informasaun no dadus.
Liuhusi plataforma sira ne’e, ema bele espresa opiniaun, prodús konteúdu no fahe kedas informasaun ba públiku iha rai-laran no mundu.
“Mídia sosiál sai hanesan espasu públiku foun ida ba diskusaun no debat, agora iha dimensaun globál. Ba utilizadór husi mídia plataforma sira ne’e prezensa mak laiha limite ba liberdade espresaun ka ema nia privasidade”, nia hatete.
Alexandrino salienta katak utilizadór sira tenke asume responsabilidade ba konteúdu, dadus no informasaun ne’ebé sira publika no fahe.
Nia hatete katak plataforma rede sosiál dijitál sira jere husi empreza privada, ne’ebé nia objetivu prinsipál mak atu halo negósiu no hetan lukru.
Tuir nia, empreza sira ne’e presiza konsidera mós preokupasaun sosiál no legál, inklui protesaun ba direitu fundamentál husi utilizadór sira no destináriu husi mensajen no publikasaun.
Alexandrino esplika katak kódigu programasaun husi plataforma mídia sosiál sira ne’e mak segredu ida husi empreza idaidak. Maski nune’e, sai ona koñesimentu públiku katak sistema sira ne’e hili no personaliza sujestaun konteúdu ba istória bazeia ba istória utilizasaun husi ema idaidak.
“Nune’e mosu pergunta katak liberdade espresaun husi utilizadór idaidak hetan kondisionamentu? Komunidade, nasaun ida, mundu hetan distorsaun husi empreza sira ne’e tuir nia interese privada, no la’ós tuir interese Estadu no utilizadór sira”, nia argumenta.
Deputadu ne’e salienta katak aplikasaun no software bazeia ba Intelijénsia Artifisiál (AI), hamutuk ho mídia sosiál, aumenta risku sira ba liberdade espresaun, integridade no imparsialidade opiniaun públika, no ba soberania Estadu sira-nia. “Tanba ema ruma hetan podér atu introdús iha rede sosiál sira konteúdu falsa, difamasaun, manipulasaun no seluk tan”, nia salienta.
Notísia relevante: Parlamentu Foinsa’e diskute kona-ba liberdade espresaun no direitu sidadaun
Jornalista: Nelson de Sousa
Editora: Maria Auxiliadora
