Holsa loke kompetisaun tasa rotativa Xanana Cup
BOBONARU, 28 Agostu 2026 (TATOLI) – Klibur Matadalan ba Dezenvolvimentu Apoia Suku Holsa, postu administrativu Maliana, munisípiu Bobonaru, loke kompetisaun futeból tasa rotativa Xanana Cup, ne’ebé partisipa husi klubu 13 hodi hadau prémiu ho montante $1.000.
Kompetisaun ne’ebé realiza iha suku Holsa hetan apoiu husi Ministériu Juventude, Desportu, Arte no Kultura (MJDAK) ho osan $2.000, inklui mós kontribuisaun husi emprezáriu timoroan no komunidade xineza sira ne’ebé hala’o atividade negósiu iha Maliana.
Prezidente Komisaun Organizadora Xanana Cup, António Santa Cruz, hatete katak kompetisaun tasa rotativa ne’e foin primeira vez realiza iha Maliana no nia parte konsidera atividade ida-ne’e importante atu kontinua motiva joven sira, liuliu jogadór sira atu dezenvolve sira-nia kapasidade no talentu.
Notísia relevante: Gana ho Anelka lori Zavia FC sai kampiaun Taxa Rotativa Kuda-Ulun Bobonaru
“Ami hakarak motiva jogadór sira atu kontinua joga no hatudu sira-nia talentu. Ami husu mós atu jogadór sira labele haree de’it ba tasa, maibé tenke joga ho espíritu desportivu no hatudu katak sira duni gosta futeból”, António Santa Cruz hatete iha serimónia abertura eventu ne’ebé realiza iha kampu Futeból Holsa, sesta-feira ne’e.
Iha sorin seluk, Reprezentante Prezidente Autoridade Munisípiu Bobonaru, Jonas Carro, apresia inisiativa komunidade Holsa nian, tanba kontinua organiza atividade oioin ne’ebé bele hamosu dinamizmu iha suku.
Nia hatete katak kompetisaun futeból hanesan Xanana Cup bele sai oportunidade ida atu identifika jogadór sira ne’ebé iha talentu di’ak, liuliu bainhira munisípiu Bobonaru prepara atu partisipa iha Festivál Nasionál Desportu (FND).
“Ministériu Juventude, Desportu, Arte no Kultura planu ona atu hala’o eventu nasionál iha fulan-Novembru, ho modalidade 13, inklui futeból. Semana kotuk ami entrega ona responsabilidade ba asosiasaun desportu sira atu hahú identifika jogadór. Entaun, kompetisaun hanesan ne’e mak oportunidade di’ak atu asosiasaun futeból bele haree jogadór sira ne’ebé iha talentu atu reprezenta munisípiu Bobonaru”, Jonas Carro realsa.
Nia husu ba jogadór sira atu aproveita kompetisaun ne’e ho di’ak no hatudu sira-nia kapasidade, tanba ekipa téknika sei hala’o prosesu selesaun atu hili atleta sira.
“Imi hatudu talentu, tátika, joga di’ak iha ne’e, asosiasaun sei halo selesaun ba imi atu reprezenta munisípiu Bobonaru ba kompete ho munisípiu 12 iha nasionál”, nia salienta.
Sekretáriu-Jerál Asosiasaun Futeból Bobonaru, Rosalino Loe Lesu, agradese ba parte hotu ne’ebé kontinua apoia no organiza eventu futeból iha Maliana, tanba atividade desportiva iha munisípiu ne’e kontinua moris no la para.
Nia espera katak husi kompetisaun oioin ne’ebé realiza iha komunidade, bele hamosu jogadór foun sira atu kontinua dezenvolve futeból iha Bobonaru.
“Objetivu prinsipál la’ós deit atu sai vensedór ka tasa ne’e mak importante. Kompetisaun ne’e tenke sai oportunidade ba jogadór sira atu hadi’a no dezenvolve sira-nia talentu, atu iha futuru bele sai jogadór ne’ebé di’ak no bele reprezenta munisípiu”, nia akrexenta.
Iha oportunidade hanesan, Segundu Komandante PNTL Munisípiu Bobonaru, Superintendente Carlos Moniz Maia, garante katak PNTL prontu atu fó apoiu seguransa durante kompetisaun ne’e to’o ramata ho susesu.
Nia husu ba jogadór no apoiadór sira atu hametin espíritu desportivu, evita problema no uza kompetisaun ne’e atu hametin relasaun entre joven sira husi área oioin iha Maliana.
“Jogu ida-ne’e oportunidade ba ita hotu atu koñese malu di’ak liután. Maski mai husi fatin diferente, liuhusi desportu ita bele hametin amizade no hamosu mós fini jogadór foun ba munisípiu Bobonaru,” Superintendente Carlos Moniz Maia dehan.
Ba premiu, ekipa ne’ebé hetan primeiru lugar sei simu osan $1.000 ho tasa rotativa, segundu lugar $600, terseiru lugar $300 no kuartu lugar $100.
Kompetisaun Xanana Cup ne’e espera bele kontinua fó oportunidade ba joven sira iha Maliana atu hatudu sira-nia talentu no prepara kapasidade jogadór sira atu partisipa iha kompetisaun nivel munisipál no nasionál.
Notísia relvante: Klubu 10 sei kompete iha eventu futeból Holsa Cup 2024
Jornalista: Sergio da Cruz
Editora: Maria Auxiliadora
