BOBONARU, 25 Jullu 2026 (TATOLI)–Klubu Zavia FC konsege sai kampiaun iha kompetisaun Taxa Rotativa Kuda-Ulun Bobonaru époka 2026 hafoin halakon Sahol FC ho rezultadu 2-0 iha partida finál ne’ebé realiza iha Bobonaru.
Golu rua ne’ebé garante vitória ba Zavia FC prodús husi jogadór Gana ho kamizola númeru 4 no Anelka ho kamizola númeru 19 iha parte daruak no tempu adisionál hodi lori ekipa ne’e sai kampiaun.
Sekretáriu Estadu Arte no Kultura, Jorge Cristovão, ne’ebé reprezenta Ministru Juventude, Desportu, Arte no Kultura, hato’o apresiasaun ba autoridade seguransa, komisaun organizadora, Asosiasaun Futeból Bobonaru no komunidade tomak tanba kontribui ba susesu kompetisaun ne’e.
“Lori Governu nia naran, ami hato’o parabéns ba ekipa ne’ebé hetan primeiru no segundu fatin. Ami apresia tebes kolaborasaun entre komisaun organizadora no Asosiasaun Futeból Bobonaru ne’ebé halo eventu ida-ne’e ramata ho di’ak,” Jorge Cristovão hato’o iha enserramentu jogu, Sábadu ne’e.
Prezidente Autoridade Munisípiu (PAM) Bobonaru, Paulo Moniz Maia, konsidera kompetisaun ne’e nu’udar espasu importante ida atu fó oportunidade ba joventude husi postu administrativu neen iha munisípiu atu hatudu sira-nia talentu iha futeból.
Notísia Relevante: Klubu futeból sanulu harame Maliana liuhusi desportu komunitáriu
Kompetisaun ne’e partisipa husi klubu 20 no ikus mai rua de’it mak to’o bá finál.
Governante ne’e dehan, rezultadu manán ka lakon mak parte husi desportu, maibé objetivu boot liu mak hametin amizade, unidade no koñesimentu entre joventude husi suku no postu administrativu sira.
“Parabéns mós ba klubu hotu no prezidente klubu, jogu ne’e dalaruma balu manán, balu tenke lakon. Lakon mós ita-nia, manán mós ita-nia, manán mós labele kontentie liu, lakon mós labele triste liu, tempu sei iha Bobonaru sei ba oin ein termu Desportu, liuliu ba iha Futeból,” nia katak.
Paulo Moniz Maia rekomenda ba Asosiasaun Futeból Bobonaru atu kontinua realiza Taxa Rotativa kada tinan atu prepara klubu sira partisipa iha kompetisaun sira seluk iha futuru.
Autoridade Munisípiu Bobonaru sei kontinua aloka orsamentu ba atividade desportiva no sei buka apoiu husi Governu, liuliu Ministériu Juventude, Desportu, Arte no Kultura atu dezenvolve modalidade oioin hanesan futeból, voleiból no futsál tanba desportu bele suporta Autoridade Munisípiu ba preparasaun simu poder lokál no desentralizasaun administrativa.
“Importante joven sira ne’ebé mak ho nia talentu ida-idak mai espresa, bainhira ita espresa ita-nia talentu sira ne’e liuhusi preparasaun no vontade, ne’ebé joga ne’e la’os buka manán de’it, maibé amizade entre joven ho joven, unidade koñese malu husi postu ida-ne’e ba postu ida-ne’ebá, suku ida-ne’e bá suku ida ne’ebá. Ita hamutuk atu koñese malu, amizade hodi hala’o dezenvolvimentu iha ita-nia munisípiu,” nia katak.
Komunidade Maliana, Fidelio de Jesus, konsidera, eventu ne’e fó animasaun ba komunidade durante fulan tolu liubá tanba kada fim de semana iha atividade ne’ebé bele lori ema haksolok hamutuk no kontente.
“Ami espera Asosiasaun Futeból bele kontinua organiza kompetisaun hanesan ne’e tanba bele hametin amizade entre joventude, kria pás no estabilidade, no kontribui ba dezenvolvimentu Munisípiu Bobonaru,” Fidelio tenik.
Jogu ne’e ba primeiru lugar simu prémiu ho medalla no osan hamutuk $2.000. Sahol FC, hanesan segundu kampiaun simu taxa, medala no osan $1.000, enkuantu kampiaun terseru Maliana United simu $500 no Nego-Nego Fc kuartu lugar simu $200.
Jornalista : Sergio da Cruz
Editora : Julia Chatarina
