iklan

SOSIEDADE SIVĺL

KSTL: Traballadór serbisu to’o tinan-10 maibé saláriu nafatin $115 ne’e la justu

KSTL: Traballadór serbisu to’o tinan-10 maibé saláriu nafatin $115 ne’e la justu

Prezidente KSTL, Almério Vila Nova. Imajen Tatoli/António Gonçalves

DILI, 01 maiu 2024(TATOLI)— Prezidente Konfederasaun Sindikatu Timor-Leste (KSTL), Almerio Vilanova, kompromete katak KSTL kontinua nafatin luta ba protesaun traballadór nian  iha serbisu fatin.

Ami-nia servisu mak atu fó protesaun ba traballadór nian bainhira sira hasoru problema ruma iha sira-nia serbisu fatin,” Almerio Vilanova hateten ba TATOLI iha segunda (29/04/ 2024).

Nia informa, iha buat tolu ne’ebé mak KSTL atu tau atensaun mak dahuluk traballadór ida   atu hahú serbisu mak iha ema seluk ida mai servisu fali ida ne’e mós KSTL tau hotu atensaun.

Daruak, mak nia servisu ona hanesan nia asina tiha ona kontratu entaun traballadór kumpri ona nia dever ne’ebé mak regula ona iha kontratu, maibé nafatin  hasoru problema oioin hanesan bele enfrenta kondisaun serbisu ne’ebé mak la di’ak,  ezemplu; durante serbisu labele hemu bee, labele ba hariis-fatin,  entaun ida-ne’e mós la di’ak. Entaun, KSTL haree hotu ba ida-ne’e.

Datoluk mak abuzu poder iha servisu fatin hanesan empregadu ne’e hakarak halo tan servisu seluk, entaun ida ne’e la tuir ona traballadór ninia dever ne’ebé mak hakerek iha kontratu laran, entaun problema hanesan ne’e mós KSTL nia prezensa tenke iha ne’ebá.

“Ita haree ba traballadór sira ne’ebé mak sente hetan diskriminasaun husi prosesu rekrutamentu tenke hato’o keixa mai iha KSTL atu nune’e ita halo komunikasaun ba dirijente empreza nian hodi husu klarifikasaun katak tanba saida mak akontese ida-ne’e, entaun ita iha direitu atu hetan justifikasaun ba kondisaun sira tanba dalabarak traballadór sira la iha koñesimentu kona ba ida-ne’e,” nia konsidera.

La justu

Líder másimu KSTL ne’e salienta, ho problema sira hanesan ne’e tenke hadi’a nune’e la bele mosu problema iha ne’ebá dalabarak traballadór ida serbisu iha empreza ida serbisu too’ tinan 10 nia laran, maibé ninia saláriu nafatin $115. Ida-ne’e la justu.

“Ho problema sira hanesan ne’e, ami tenke  haree no hadi’a serbisu sira ne’e  nune’e labele mosu problema hanesan ne’e, tanba dalabarak traballadór ida serbisu iha empreza ida serbisu to’o tinan 10-nia laran,  maibé ninia saláriu nafatin $115 ida ne’e la justu tanba 115 saláriu mínimu ne’e ba traballadór ne’ebé mak foin hahú serbisu, maibé traballadór ne’ebé serbisu kle’ur ona mak nafatin saláriu mínimu mak empregadór sira aproveita ho lakuna  sira iha  lei ne’e, tanba lei  ba saláriu  mínimu la iha,” nia esplika.

Ko’alia kona-ba kontrola, iha artigu 79.o lei númeru 4/2012 hateten katak fó kna’ar ba KSTL atu haree no servisu hamutuk ho Inspeksaun Jerál Traballu (IJT, sigla portugés) halo supervizaun no implementasaun ba lei no regra ne’ebé mak iha TL.

“Ita mós nafatin serbisu ho IJT hodi implementasaun ba lei no regra ne’ebé mak iha iha ita-nia rain,” nia konklui.

Jornalista: Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!