DILI, 13 novembru 2024 (TATOLI) — Timor-Leste liuhosi Institutu Nasionál ba Dezenvolvimentu Forsa Traballu (INDMO) sai uma-na’in ba Kompetisaun Abilidade Amizade Internasionál Timor-Leste ba dahuluk no Kompetisaun Abilidade Nasional ba dala ualu ho tema “Elevasaun abilidade sira, hakbiit futuru sira”, ne’ebé hahú husi loron 13-15 fulan-Novembru tinan ne’e.
Eventu ne’e marka kompetisaun abilidade internasionál dahuluk iha Timor-Leste, hodi hatudu kompromisu nasaun nian atu hametin nia Sistema Edukasaun no Formasaun Téknika no Profisionál (TVET) hodi hatán ba ezijénsia merkadu traballu lokál no globál.
Organiza iha kolaborasaun ho Ministériu Koordenadór ba Asuntu Ekonómiku (MKAE), World Skills Ázia (WSA), no parseiru nasionál no rejionál sira, eventu ne’e ho objetivu atu hadi’a Timor-Leste nia pozisaun iha dezenvolvimentu abilidade internasionál.
Diretora INDMO, Isabel Fernandes de Lima, hateten tema ba kompetisaun tinan ida-ne’e inkorpora vizaun INDMO nian atu harii futuru ne’ebé nabilan no reziliente liu ba TL liuhusi kbi’it dezenvolvimentu abilidade.
“Hodi foka ba hadi’a abilidade sira, ami subliña ami-nia kompromisu atu ekipa foin-sa’e sira ho kompeténsia no abilidade sira ne’ebé relevante ba indústria ne’ebé maka krítiku ba forsa traballu ohin loron nian. Bainhira ita ko’alia kona-ba habiit futuru, ita refere ba impaktu transformativu ne’ebé abilidade sira-ne’e sei iha hodi forma ita-nia nasaun nia futuru”, Diretora INDMO Isabel Fernandes de Lima hateten iha salaun Mahoka, ohin.
Nia dehan, kompetisaun Abilidade Amizade Internasionál Timor-Leste ba dala ida foka liu ba Servisu Restaurante hahán no bebida ne’ebé partisipante sira husi Austrália na’in ida, Indonézia na’in rua no Timor-Leste na’in sia ,inklui ekipa juri profisionál ba otelaria no restaurante na’in 10.
Kompetisaun Abilidade Nasionál ba dala-ualu ne’e sei hala’o iha kategoria Instalasaun Elétrika no Soldadura, iha Sentru Formasaun Don Bosco Comoro no CNEFP-Tibar, nune’e partisipante na’in 13 sei mai hosi sentru formasaun sira iha Dili, Liquiça no Baucau. Ekipa juri ba eventu nasionál ne’e kompostu husi ema na’in neen husi Timor-Leste no Austrália. Malázia sei hatudu abilidade instalasaun elétrika ho teknolojia KNX.
“Ida-ne’e hanesan kompetisaun amizade ida atu fo korajen ba ita-nia joven sira, prémiu ba primeiru lugar sei $1.000, segundu lugar $750 no terseiru lugar $500”, nia hateten.
Abertura no enserramentu ba eventu ne’e hetan partisipasaun husi ofisiál superiór Governu Timor-Leste nian, inklui MKAE no mós diplomata sira, líder indústria no reprezentante formasaun profisionál sira. Sira -nia partisipasaun subliña kompromisu nasaun nian atu fornese kapasidade futuru ba kolaborasaun internasionál.
Iha fatin hanesan, Koordenadór Jerál MKAE, Jorge Rui de Carvalho, rekoñese katak eventu ne’e la’ós de’it aprezenta dedikasaun no talentu joven sira-nian, maibé mós forsa parseria internasionál ne’ebé buras daudaun.
“Kompetisaun ida-ne’e la’ós de’it konkursu ida. Ida-ne’e maka viajen aprendizajen ida, auto-dezenvolvimentu no troka. Iha ne’ebé imi ida-idak sei serbisu maka’as. La’ós de’it ho abilidade sira ne’ebé aumenta, maibé mós ho konfiansa no komprensaun ne’ebé boot liu”, Jorge Rui de Carvalho, subliña.
Nia informa, kompetisaun abilidade ne’e fó plataforma ba partisipante foinsa’e sira iha formasaun profisionál hodi hatudu sira-nia abilidade no oferese oportunidade ba empregadór lokál no internasionál sira. Ida-ne’e enkoraja kriasaun traballadór kualifikadu no importánsia husi edukasaun profisionál iha dezenvolvimentu ekonómiku nasaun nian.
CEO WorldSkiils Asia (WSA) Fahar Al Suwadi, rekoñese katak kompetisaun ne’e halibur individu joven talentu husi ekipa husi nasaun oioin ne’ebé sei loke dalan ba oportunidade barak iha futuru.
“Ha’u mós hakarak agradese ba parseiru sira husi Governu, indústria no edukasaun ne’ebé halo kompetisaun ida-ne’e sai posivel. Kolaborasaun entre parseiru globál no internasionál sira ne’e hatudu kbiit hosi serbisu hamutuk hodi eleva ita-nia jerasaun joven sira”, nia hateten.
Embaixadór Repúblika Indonézia, Okto Dorinus Manik, fiar katak kompetisaun ne’e atu hasa’e abilidade iha sentidu pozitivu hodi koko ida-idak nia abilidade.
“Ho ida-ne’e, ha’u hanoin neneik ita bele hadi’a no hadi’a ita-nia abilidade, tenke iha kompetisaun, ne’e di’ak atu ema bele sai di’ak liután, se lae ita sei sente hanesan ita mak boot liu”, Okto Dorinus Manik reforsa.
Eventu loron tolu ne’e loke ba públiku no konvida empreza ka parseiru indústria sira atu observa talentu joven sira, no mós estudante sira ne’ebé bele koko hatudu sira-nia abilidade. Entaun reprezentante sira hosi Austrália, Xina no Malázia mós marka prezensa nu’udar observadór ba eventu ida-ne’e.
Jornalista : Felicidade Ximenes
Editór : Zezito Silva
