UNTL husu estudante 7.149 la ativu atu regulariza matríkula administrasaun
DILI, 13 novembru 2024 (TATOLI)–Universidade Nasionál Timor-Lorosa’e (UNTL) liuhusi reitoria universitária husu atu estudante 7.149 ne’ebé la ativu atu mai regulariza matríkula administrasaun nune’e bele sai estudante ativu.
“Ita-nia estudante sira-ne’e hamutuk 7.149 mak presiza atu mai fali halo regulariza. Regularizasaun ba matríkula liuhusi prosesu ne’ebé prevee iha artigu 8 husi Regulamentu Akadémiku UNTL nian. Ho prazu husi loron 18 novembru to’o 31 jullu 2025. Nune’e, atu repete filafali alunu 7.149 ne’ebé la ativu iha UNTL ba períodu 2013-2018 bele mai fali halo regularizasaun ba sira-nia matrikula nune’e sai estudante ativu fila-fali,” Vise-Reitór Asuntu Akadémiku no Garantia Kualidade iha UNTL, Samuel Freitas, hateten liuhusi konferénsia imprensa iha salaun UNTL, Colmera, kuarta ne’e.
Sistema Informasaun Rejistu Akadémiku (SIRA) to’o loron 30 outubru 2024 hatudu estudante 48.134 rejistadu ona, nune’e husi estudante 26.005 la ativu ( 54,03%) no estudante ativu 22.122 (45,97%). Entaun, iha tinan 2022, hahú tau atensaun ba situasaun uluk nian, ne’ebé hetan ona aprovasaun períodu apropriadu ida ba regularizasaun matríkula estudante la ativu.
“Tanba ne’e, iha agostu 2022 liuhusi Gabinete Distritu DIG 006/UNTL/R/VIII/2022, loron 08 agostu 2022, kona-ba matadalan jerál ba implementasaun kuadru peskiza iha UNTL, deside atu fó períodu regularizasaun fulan-18 ba estudante sira-nia matríkula la ativa, liuhusi prosesu lee dalimak. Períodu ida-ne’e estende ba estudante naun ativu sira ne’ebé hetan lisensa ba UNTL iha tinan 2024,” Vise-Reitór akresenta.
Notísia relevante : Estudante UNTL 1.728 simu graduasaun
UNTL konsege regula matríkula 239 iha loron 31 outubru 2024, hodi husik matríkula sira seluk ne’ebé la regula husi sistema rejista.
Aleinde ne’e, DGSAA sei halo tékniku atu hasai dadus liuhusi despaisu espesífiku husi Reitór ne’ebé fó sai ba efeitu ida-ne’e. Regularizasaun matríkula estudante naun ativu sira-nian husi tinan 2013-2018.
“Ohin ita sei anúnsia prazu ba faze daruak husi regularizasaun matríkula espesifikamente ba estudante la ativu sira husi UNTL, ne’ebé tenke ramata ona kursu entre tinan 2019 no 2024, ba kursu sira siklu primeiru ne’ebé iha durasaun tinan-haat. Estudante naun ativa sira, ne’ebé matríkula iha UNTL entre tinan 2013 no 2018, prodús totál ema 10. 250 no la ativu 7.149,” nia tenik.
Fakuldade Agrikultura hamutuk 787, Fakuldade Enjiñaria, Siénsia no Teknolojia 753, Fakuldade Edukasaun, Arte no Umanidade 2.536, Fakuldade Medisina no Siénsia Saúde 195, Fakuldade Ekonomia no Jestaun 772, Fakuldade Siénsia Sosiál 966, Fakuldade Direitu 503, Fakuldade Siénsia Sosiál 164, Fakuldade Filozofia 140, Fakuldade Turizmu, Arte no Indústria Kreativa no Kultura 335.
Jornalista : Osória Marques
Editora : Julia Chatarina
