DILI, 13 novembru 2024 (TATOLI)—Universidade Nasionál Timor-Lorosa’e (UNTL) propoin estudante foun hamutuk 4.095 ba tinan letivu 2025 nian ba Ministériu Ensinu Superiór Siénsia no Kultura (MESSK).
“Kona-ba selesaun prosesu asesu ba UNTL ita seidauk bele fó sai tanba sei iha prosesu nia-laran, maibé UNTL propoin ba MESSK estudante hamutuk 4.095,” Reitór UNTL, João Soares Martins, informa iha salaun UNTL, Colmera, kuarta ne’e.
Númeru ne’e hetan husi fakuldade ne’ebé mak submete ba reitoria, tanba ne’e apar ona ho rekursu umanu no infraestrutura nian.
“Ami konsiente katak ami-nia rekursu umanu no saladeaula disponível, ne’ebé la’ós retoria mak obriga maibé dadus husi kada kursu maihusi kada fakuldade. Ami fiar katak ami bele handle ho númeru ne’ebé ami propoin,” nia akresenta.
Notísia relevante : UNTL husu estudante 7.149 la ativu atu regulariza matríkula administrasaun
Iha sorin seluk, MESSK rejista ona estudante hamutuk 173 tama iha rejime espesiál asesu ba UNTL no Institutu Politékniku Betano (IPB).
“Profesór sira sei fó teste ba estudante sira iha semana rua mai tan. Agora ba sira-neʼebé rejime jerál ne’e hein de’it Ministériu Edukasaun tanba sei hein valór ezame nasionál. Rejime espesiál ne’e hamutuk 173 no ohin ha’u foin simu informasaun husi Diretór Jerál,” Ministru Ensinu Superiór, Siénsia no Kultura, José Honório da Costa Pereira Jerónimo, hatete.
Rejime espesiál sei tuir teste maibé rejime jerál hein Ministériu Edukasaun (ME) bainhira fó lista mai katak sira ne’e mak pasa no haree ba valór di’ak bele tama UNTL no IPB.
Jornalista : Osória Marques
Editora : Julia Chatarina
