OÉ-CUSSE, 14 Novembru 2024 (TATOLI) – Komisaun organizadora husi Ministériu Administrasaun Estatál (MAE) hamutuk ho Autoridade Rejiaun Administrativa Espesiál Oé-Cusse Ambeno (RAEOA) observa kampu 01 de Maio Palaban hodi uza ba komemorasaun Loron Proklamasaun Independénsia 28 Novembru 2024.
Fatin ne’e lokaliza iha bairru Palaban, suku Costa, sub-rejiaun Pante Makasar, besik aeroportu internasionál Rota do Sândalo.
“Komisaun organizadora husi nivel nasionál ho lokál RAEOA tuur hamutuk hodi junta hanoin no programa ne’ebé sei hala’o iha komemorasaun 28 Novembru tinan ne’e iha Oé-Cusse. Presiza serbisu hamutuk tanba buat balun ne’ebé iha nivél nasionál mak sei responsabiliza, liuliu iha loron 28 Novembru ne’e. Fatin ami indika Palaban 01 de Maio, agora ita mai iha terrenu hodi observa fatin ne’e”, Diretór Unidade Koordenasaun Servisu Administrativu RAEOA no Ataúro, Sebastião Pereira, dehan.
Nia salienta katak komisaun husi nivel nasionál observa atu kompleta saida mak presiza hadi’a iha semana ne’e. “Agora, ba feira ita sei hala’o iha Lifau no korrida cavalo hala’o iha suku Cunha. Ba atividade sira seluk sei iha faze diskusaun tuirmai”, nia hateten.
Iha fatin hanesan, Sekretáriu Rejionál ba Asuntu Administrasaun, Adré Lao, hanesan komisaun organizadora husi RAEOA informa katak preparasaun ne’e sei hahú iha semana ne’e to’o semana oin no prioridade mak fatin selebrasaun tenke iha.
“Ami diskute no importante mak loron isár bandeira nasionál ne’e prepara grupu isár bendera no parada militár, tanba fatin selebrasaun ita uza fatin uluk selebrasaun tinan 500 iha 2015 mak 01 de Maio Palaban, tanba tempu besik ona, entaun presiza atu hadi’a”, nia realsa.
Hola parte iha enkontru koordenasaun ne’e mak autoridade komunitária husi suku 18, jestór sub-rejiaun haat, PNTL no F-FDTL, kargu xefia no xefe departamentu sira.
Tema prinsipál ba aniversáriu loron nasionál ka Loron Proklamasaun Independénsia da-49 iha 28 Novembru 2024 mak “Orgullu ba ita-nia identidade no kultura, ita harii futuru liberdade, justisa no esperansa ba ita-nia Povu”.
Notísia relevante: Governu aprova tema prinsipál ba loron proklamasaun independénsia dala-49
Jornalista: Abílio Elo Nini
Editora: Maria Auxiliadora
