COVALIMA, 14 Novembru 2024 (TATOLI) – Funsionáriu Alfándega seidauk uza mákina movel raiu-xís cargo scanner-wave body inspection iha postu integradu fronteira Salele, Mota-Masin, iha postu administrativu Tilomar, munisípiu Covalima.
Diretór Alfándega Mota-Masin, Nuno Nogueira, esplika razaun mákina ne’e seidauk utiliza, tanba fatin atu tau ekipamentu ne’e mak seidauk iha.
“Ita-nia mákina raiu-xís ne’ebé inaugura ona husi Ministra Finansa ita seidauk uza, tanba seidauk iha fatin atu utiliza, nune’e mákina sei rai hela iha armazein”, Nuno Noguiera informa.
Nia dehan mákina atu halo operasaun presiza fatin, tanba nia iha ain haat no presiza movel tun-sa’e hodi scan karreta ho sasán atu ajuda funsionáriu sira halo verifikasaun fízika ba sasán.
“Ita iha ona rai maibé seidauk halo konstrusaun, nune’e seidauk bele uza, tanba udan no loron labele kona mákina. Tan ne’e mak funsionáriu sira seidauk bele uza, maibé nafatin hamoris mákina”, dehan.
Dirijente ne’e mós halo ona diskusaun atu disponibiliza formasaun kona-ba utilizasaun mákina raiu-xís ba funsionáriu Alfándega sira no daudaun nomeia ona funsionáriu na’in-rua atu tuir formasaun iha Xina hodi utiliza mákina no sira mós sei fó fali formasaun ba funsionáriu sira seluk.
“Funsionáriu na’in-rua atu tuir formasaun iha Xina halo ona aplikasaun ba vistu no hotu ona. Sira bele arranka tanba formasaun durante semana rua no aprende oinsá atu halo operasaun ba mákina raiu-xís”, salienta.
Lembra katak Ministra Finansa, Santina Cardoso, lansa mákina movel raiu-xís cargo scanner-wave body inspection iha postu integradu Fronteira Salele, Mota-Masin, iha loron 10 Maiu 2024.
Mákina raiu-xís ne’e sosa ho Orsamentu Jerál Estadu 2021 ho montante pur volta millaun $2,6. Ekipamentu ne’e atu ajuda ofisiál sira serbisu iha fronteira bainhira halo pasa-revista sasán ho manuál no lori tempu naruk ho lalais liu.
Notísia relevante: Governu lansa mákina raiu-xís iha fronteira Mota-Masin
Jornalista: Celestina Teles
Editora: Maria Auxiliadora
