COVALIMA, 10 Maiu 2024 (TATOLI) – Ministra Finansa, Santina Cardoso, lansa mákina Mobile X-Ray Cargo Scanner-Wave Body Inspection iha Postu Integradu Fronteira Salele, Mota-Masin, iha postu Tilomar, munisípiu Covalima.
Ministra Finansa dehan Governu kontinua hadi’a kondisaun iha postu integradu sira, tanba ne’e entidade ne’ebé serbisu iha postu iha papél importante atu kontrola sasán no ema tama no sai husi Timor-Leste bá iha nasaun vizina Indonézia.
“Iha postu integradu fronteira la’ós presiza de’it mak ekipamentu, maibé mós tékniku sira hodi garante sasán merkadória ne’ebé importa liuhusi fronteira ho objetivu mak hakarak fó seguransa no asegura saúde ba komunidade”, governante dehan iha Mota-Masin, ohin.
Ho ekipamentu ne’ebé iha, tékniku ne’ebé serbisu iha fronteira presiza halo kooperasaun ho nasaun vizina Indonézia, tanba depoizde covid-19 importasaun sasán iha fronteira maka’as, nune’e iha 2021, Governu halo prosesu akizisaun ba mákina raiu-xís atu fasilita serbisu Alfándega iha fronteira.
Mákina raiu-xís ne’e sosa ho Orsamentu Jerál Estadu 2021 ho montante pur volta millaun $2,6. Ekipamentu ne’e atu fasilita ofisiál sira serbisu iha fronteira bainhira halo pasa revista sasán ho manuál ne’ebé lori tempu naruk ho lais liu.
Komisáriu interinu Autoridade Aduaneira, Armindo dos Santos , relata katak durante ne’e prosesu importasaun ho esportasaun merkadoria halo pasa revista ho manuál, tanba ne’e presiza iha mákina raiu-xís atu ajuda scan ba sasán hodi fasilita funsionáriu sira-nian serbisu iha fronteira.
Reprezentante Prezidente Autoridade Covalima, Filomeno Cardoso, hato’o agradese tanba iha ona mákina raiu-xís iha fronteira Mota-Masin.
“Mákina X-Ray bele deteta sasán ne’ebé la hakerek iha lista kompra. Tekniku sira sei serbisu ho kuidadu no sai na’in no autór prinsipál atu asegura importasaun sasán ne’ebé tama iha ita-nia nasaun”, nia realsa.
Notísia relevante: Governu lansa báskula-ponte ba karreta tula sasán iha fronteira Batugadé
Jornalista: Celestina Teles
Editora:Maria Auxiliadora
