DILI, 14 novembru 2024 (TATOLI) – Parlamentu Nasionál (PN), aprova proposta Orsamentu Jerál Estadu (OJE) 2025 ho montante $18,889,241 husi Ministériu Finansa (MF) iha faze espesialidade ho votu afavór 43, kontra 18 no abstensaun tolu (3).
Notísia relevante:https://tatoli.tl/2024/10/25/mf-tau-prioridade-aumenta-kollesaun-reseita-naun-petrolifera-iha-2025/
“Orsamentu Ministeriu Finansa pasa ,’’ Prezidente Parlamentu Nasionál, Deputada Maria Fernanda Lay, fó sai iha debate proposta OJE 2025 iha faze espesialidade ba loron datoluk iha sala plenária PN, kinta ne’e.
Husi proposta OJE 2025 MF $18,889,241, komposta husi saláriu no vensimentu $9,659,322, bens no servisu $8,347,225, kapitál menór rihun $45, kapitál dezenvolvimentu $837,694.
Tuir dokumentu livru proposta OJE 2025 kona ba Planu Asaun Annual Entidade públiku setór administrativu, ba tinan oin husi proposta orsamentu MF ne’e sei finansia ba programa jestaun finansa públika ho sub-programa mellora despeza públika ho atividade 13, sub-programa aumenta kolesaun reseita doméstika 14, sub-programa jestaun patrimóniu Estadu ho atividade ha’at, sub-programa mobilizasaun dívida públika no ajuda externu ho atividade tolu, sub-programa polítika no jestaun fundu petrolíferu ho atividade rua, sub-programa rekolla dadus ho atividade tolu.
No programa funsionamentu no dezenvolvimentu instituisionál ho sub-programa tolu no atividade 25.
Jornalista: Nelson de Sousa
Editór: Cancio Ximenes
