DILI, 15 novembru (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 $$ 13,353,528 ba Ministériu Transporte no Komunikasaun (MTK) iha faze espesialidade ho votu afavór 42, kontra 18 no abstensaun tolu (3).
Notisia Relevante: OJE 2025: MTK prioriza konklui instalasaun fibra ótika kabu submarinu
“Hodi nune’e orsamentu MTK pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 faze espesialidade loron dahaat, sesta ne’e.
Proposta OJE 2025 MTK ho totál $13,353,528 ne’e aloka ba saláriu vensimentu $4,659,105, bens no serbisu $6,336,053, transferénsia públika $1,811,500, kapitál menór rihun $250, kapitál dezenvolvimentu $296,870.
Husi orsamentu ne’e hodi finansia programa transporte ho sub-programa jere integrasaun seguransa no dezenvolvimentu rejionál transporte terrestre ho atividade haat (4), sub-programa infraestrutura no transporte terrestre ho atividade neen (6), sub-programa jere serbisu atendimentu públiku no munisípiu ho atividade ida (1), sub-programa transporte marítima ho atividade lima (5).
Programa funsionamentu no dezenvovimentu institusional ho sub-programa tolu (3) no atividade 11.
Programa serbisu postál ho sub-programa jestaun integrasaun estrutura rede serbisu postál ho atividade tolu (3).
Programa inkluzaun sosiál ho sub-programa deklarasaun Maubisse ho atividade neen (6).
Programa teknolójia informasaun no komunikasaun ho sub-programa fornesimentu komunikasaun efisiente, fiávies, seguru no asesível ba Governu ho kapasidade sufisiente ho atividade tolu (3).
Prorgama meteorolojia no jeofízika ho sub-programa jestaun kualidade informasaun serbisu meteorolójiku ho atividade tolu (3).
Tau atensaun rede internet
Durante diskusaun proposta OJE 2025 ba MTK, Deputadu KHUNTO, Antonio Verdiál de Sousa, prekupa ho liña internet husi operadór telekomunikasaun sira durante ne’e, nune’e husu MTK tau atensaun.
“Husu esplika tanbasá, rede Timor Telekom durante la’o lenuk loos,” nia dehan.
Deputadu FRETILIN, Antoninho Doutel, husu tau atensaun ba asidente tráfiku akontese liga ba sirkulasaun transporte públiku sira tula pasajeiru, nune’e presiza tau atensaun polítika ruma hodi redús.
Deputadu CNRT, Oscar de Araujo, hateten funsionamentu rede Timor Telekom hanoin ho fibra otika la’o hela iha tempu oin mai bele solusiona.
“Movimentu transporte hanoin tempu naruk ministeriu orienta klaru, motorista sira mak la kontrolu, tanba ne’e husu motorista sira kontrola pasajeiru merese tula ho kapasidade ne’ebé iha,” nia dehan.
Deputada PD, Antonio da Conceição “Kalohan”, dehan problema rodoviáriu no kaereta boot mai la’o iha Estrada, nune’e presiza halo lei ruma bele rezolve atu hanesan kria armazen deskarega iha fronteira regula kamioneta tula sasán tama husi fronteira.
Ministru Transporte no Komunikasaun (MTK), Miguel Marques Gonçalves Manetelo, hateten kona-ba liña internet ne’e, loos duni, nune’e Estadu iha dalan seluk atu rezolve nune’e iha investimentu seluk fibra obtika.
Notisiare Levante: OJE 2025: MTK prioriza konstrusaun aeroportu internasionál Nicolau Lobato Comoro
Jornalista : Nelson de Sousa
Editór : Cancio Ximenes
