PN aprova orsamentu MACLN millaun $207-resin iha espesialidade
DILI, 15 novembru (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 $207,069,136 ba Ministériu Asuntu Kombatente Libertasaun Nasionál (MACLN) iha faze espesialidade ho votu afavór 45, kontra 0 abstensaun 17.
Notísia Relevante: OJE 2025: MACLN prevee millaun $207 selu veteranu rejistadu 2009
https://tatoli.tl/2024/10/23/oje-2025-macln-prevee-millaun-207-selu-veteranu-rejistadu-2009/
“Ne’ebé orsamentu pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 iha faze espesialidade, sesta ne’e.
Porposta OJE 2025 ba MACLN $207,069,136 hodi aloka ba saláriu vensimentu $1,787,636, bens no serbisu $ 5,949,982, transferénsia públika $195,515,922, kapitál menór rihun $76 no kapitál dezenvolvimentu $3,739,596.
Husi orsamentu ne’e, MACLN sei finansia programa funsionamentu no dezenvolvimentu instituisionál ho sub-programa rua no atividade hitu.
Programa inkluzaun sosiál ho sub-programa rekoñesimentu no valorizasaun luta libertasaun nasionál ho atividade rua (2), sub-programa protesaun sosiál ba kombatente ho atividade ida (1), sub-programa infraestrutura ho atividade ida (1), sub-programa bolsa estudu ho atividade ida (1).
Jornalista : Nelson de Sousa
Editór : Cancio Ximenes
