VIQUEQUE, 15 novembru 2024 (TATOLI)- Progresu konstrusaun ba projetu komunitária ba konstrusaun edifísiu Ensinu Báziku Filiál (EBF) Loco-Loco, ne’ebé lokaliza iha aldeia Lebadae, suku Matahoi, postu administrativu Uatulari, munisípiu Viqueque atinje ona 63,8%.
“Progresu konstrusaun to’o agora ami atinje ona 63,8%, hanesan badaen sira kontinua esforsu serbisu, atu semana oin bele atinje 75% bainhira atinje ba ida-ne’e Ajénsia Nasionál Dezenvolvimentu (AND) sei halo verifikasaun hodi halo pagamentu ba faze datoluk nian”, Enjeneira ME, Juliana Pinto da Silva, hateten ba jornalista sira, iha postu Uatulari, ohin.
Juliana relata, progresu atinjimentu konstrusaun fíziku husi 63,8% ne’e mak hanesan reboka ona, taka kalen hotu ona no komesa konstrui bandu iha parte varanda nian.
“Badaen sira hahú monta ona odamatan no janela sira. Depois ba ida-ne’e ramata hafoin ami halo pedidu ba 75% hodi taka plafon no taka keramik”, nia afirma.
Nia dehan, konstrusaun ne’e hala’o tarde tanba hasoru difikuldade hanesan udan ne’e karreta labele transporta materiál kontrusaun ba fatin konstrusaun.
“EBF Loco-Loco lokaliza iha área remota, udan labele halo servisu. Ho ida-ne’e maka ami sente sai hanesan difikuldade ba ami hodi aselera prosesu konstrusaun. Maibé, agora ami kontinua hakas an ami-nia badaen sira servisu, atu nune’e tama iha Dezembru ne’e bele finaliza konstrusaun”, nia komromete.
Projetu EBF Loco-Loco konstrui husi Grupu komunitária, mak hanesan konstrui sala tolu no haris fatin gasta orsamentu hamutuk $129,757.71 ho durasaun fulan neen, hahú konstrusaun iha loron 14 Janeiru no finaliza iha loron 14 Juñu, maibe seidauk finaliza, nune’e kontinua estende projetu referida.
Notísia relevante:Eskola EBF Fatuhada laiha espasu akumula livru
Jornalista : Vitorino Lopes da Costa
Editór : Florencio Miranda Ximenes
