OÉ-CUSSE, 15 Novembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretaria Rejionál ba Asuntu Agrikultura lansa, ohin, Programa Fila-rai époka 2024 ba suku neen ne’ebé realiza iha suku Lifau, sub-rejiaun Pante Makasar.
Iha lansamentu ne’e, Sekretária Rejionál ba Asuntu Agrikultura, Filomena Sila, apela ba agrikultór no tratorista sira atu promove liña koordenasaun iha terrenu, nune’e bele fó susesu ba programa ne’e iha Oé-Cusse.
“Benefisiáriu sira liuliu suku sira-ne’ebé alvu ba Programa Fila-rai ne’e serbisu hamutuk ho ita-nia tratorista sira, tanba sira-nia prezensa atu ajuda komunidade sira-nia nesesidade. Nune’e mós ba tratorista sira, promove kooperasaun ho komunidade, tanba ita ba atu ajuda sira, nune’e ita-nia Programa Fila-rai iha Oé-Cusse la’o ho susesu hodi fó benefisíu ba agrikultór sira,”Filomena Sia hato’o iha ámbitu lansamentu ne’e.
Notísia relevante: Suku haat aprezenta pedidu ba Agrikultura Oé-Cusse hodi apoia fila-rai
Ih fatin hanesan, Diretór Servisu Agrikultór Oé-Cusse, Amaro Efi, esplika fila-rai ne’e agrikultór sira mak prepara gazoél no ezekuta bazeia de’it ba pedidu husi suku sira submete bá agrikultura.
“Ohin ita halo lansamentu, hahú aban ita-nia tratorista sira dezloka ona bá suku ne’ebé persiza fila-rai atu hala’o ona serbisu iha terrenu. Programa ne’e la’ós gratuita, maibé autoridade apoia tratór no agrikultór sira mak prepara gazoél, ne’ebé tékniku sira kalkula ona katak kada ektare to’os-na’in tenke kontribui gazoel litru 40, no manutensaun Governu mak responsabiliza”, nia adianta.
Tanba ne’e, atu fó susesu ba programa Fila-rai, Diresaun Agrikultura Oé-Cusse prepara mákina unidade 13 no tratorista na’in-13.
“Ita kontinua hein suku sira seluk, karik persiza apoia tratór bele kanaliza hela pedidu no serbisu hamutuk ho estensionista suku, nune’e bele hetan apoia. Ita nakloke ba ema kuandu persiza”, dehan.
Agustinho Tana, nu’udar agrikultór suku Lifau, prontu atu kontribui gazoél, tanba kuandu aluga ema nian tratór despeza boot liu.
“Atu selu hand tractor ki’ik ne’e, ami sente todan tanba folin karun, ne’ebé ami prontu koopera tanba ami hola de’it gazoél. Ohin mós ami simu ona instrusaun katak kada ektare ami prepara gazoél litru 40, ne’ebé ba ami sente kamaan”, nia hateten.
Notísia relevante: MAPPF eleva koñesimentu tratorista Oé-Cusse kona-ba jestaun ba mákina
Tuir dadus provizóriu, suku neen ne’ebé sai alvu iha ba Programa Fila-rai ba époka 2024 mak iha sub-rejiaun Oésilo mak suku Usitasa’e, sub-rejiaun Pante Makasar mak suku Naimeko, Taiboko, Costa no Lifau no sub-rejiaun Nítibe mak suku Bene-Ufe.
Jornalista: Abílio Elo Nini
Editora: Maria Auxiliadora
