BOBONARO, 19 novembru 2024 (TATOLI) – Organizasaun Naun Governamentál (ONG) nasionál Hali ba Dame (HABADA), tersa ne’e motiva abitante lokál sira iha suku Holsa, postu administrativu Maliana, munisípiu Bobonaro, katak seguransa ne’e ema hotu nia responsabilidade nune’e ema hotu kontribui ba kualkér prosesu dezenvolvimentu ne’ebé la’o iha Nasaun ne’e.
Motivasaun ne’e HABADA organiza liuhusi atividade diálogu no edukasaun komunitária ba asuntu seguransa komunitária ba joven sira iha suku Holsa, postu administrativu Maliana, munisípiu Bobonaro.
HABADA nu’udar NGO nasionál ne’ebé harii iha loron 14 fulan-fevereiru tinan 2024, ho kna’ar halo monitorizasaun no advokasia, liuhusi diálogu no edukasaun komunitária ba asuntu sira seguransa umanu no Polísia Nasionál Timor-Leste (PNTL).
HABADA ho vizaun prinsipál timoroan hotu livre husi ta’uk, dame no moris di’ak. Nune’e mós iha misaun H3; Hakbesik, Hatutan no Hametin, liuhusi edukasaun no diálogu komunitária, hatutan komunidade nia lian no hametin dame iha komunidade, nune’e ema hotu hanesan sidadaun no parte husi komunidade rasik, goza nia direitu ba sira tuir deklarasaun universál direitu umanu, Konstitusaun Repúblika Demokrátika Timor-Lei no lei sira.
HABADA nia programa mak monitoriza no halo advokasia ba seguransa umanu liuhusi edukasaun seguransa no governasaun polísia nian nu’udar protetór ba direitu no seguransa sidadaun sira.
Diretór Ezekutivu HABADA, Abel Amarál, informa, atividade ne’e realiza ho objetivu oinsá atu fó hanoin ba komunidade, liuliu partisipante sira nune’e bele iha hanoin hodi kontribui ba prosesu dezenvolvimentu iha setór seguransa tanba asuntu seguransa ne’e ema hotu-hotu nia responsablidade.
Notísia relevante: Sosiedade sivíl rejionál hili asuntu neen diskute iha konferénsia ACSC/APF
“Ita hatene asuntu seguransa ne’e, dalabarak ita sempre ko’alia ne’e polísia nia servisu, komunidade sempre hateten ne’e la’ós ami-nia, ami laiha podér atu hala’o asuntu seguransa, entaun HABADA nia prezensa ne’e atu fó hanoin katak asuntu seguransa ne’e ema hotu nia, timoroan hotu-hotu tenke partisipa, kontribui, liuhusi karik iha aldeia no suku ruma, komunidade ka ema ruma halo provokasaun, sira iha obrigasaun atu intervein, hodi kontaktu ba xefe suku no Ofisiál Polísia Suku,” Diretór Ezekutivu HABADA, Abel Amarál, ko’alia iha sede suku Holsa.
Iha atividade ne’e ko’alia kona-bá matéria importante mak hanesan kolaborasaun ho autoridade lokál, liuliu estratéjia atu koopera ho PNTL no estrutura seguransa komunitária, advokasia komunidade atu hadi’ak seguransa komunitária no seluk tán.
HABADA nia pepél prinsipál mak oinsá atu ajuda estádu liuhusi hakbiit edukasaun seguransa komunitária, hasa’e koñesimentu no fó hanoin ba komunidade tomak atu kontribui ba establidade hahú husi uma-laran.
“Dalabarak akontesimentu ki’ik ruma mosu ita sempre dún ba-malu dehan ema deskoñesidu, bainhira ita-nia membru PNTL sira to’o iha fatin akontesimentu dehan ema deskoñesidu entaun papél ita-nia hanesan sidadaun ne’e seidauk hatudu, entaun iha biban ida-ne’e HABADA hakarak oinsá komunidade bele servisu hamutuk ho PNTL oinsá atu identifika, deteta, halo intervensaun ba konflitu ne’ebé mak atu mosu,” nia katak.
Sekretáriu Autoridade Munisípiu Bobonaro ba Asuntu Sosiál, Júlio Carvalho Caero, agradese ba HABADA no espera ho prezensa organizasaun ne’e bele eduka komunidade kontribui no apoia serbisu membru Konsellu Polisiamentu Komunitária (KPK) no Ofisiál Polísia Suku, tanba PNTL sei enfrenta problema barak.
“Seguransa iha suku nia laran ne’e, iha joven sira-nia liman, la’ós iha xefe suku nia-liman, tanba ita foti ona reprezentante joven feto ho mane ida, sira-ne’e mak seguransa iha suku, organiza ko’alia ho OPS oinsá rezolve,” nia katak.
Nia husu ba joven sira atu labele envolve iha aktu krime tanba asuntu seguransa sai pontu importante ida oinsá munisípiu Bobonaro atu hakat ba polítika asembleia munisipál.
“Mai ita hotu-hotu fó liman ba malu, hakmatek iha munisípiu Bobonaro atu ita halai lalais ba iha asembleia munisipál, ne’e ita kaer rasik ona buat hotu,” nia akresenta.
Jornalista: Sérgio da Cruz
Editór: Evaristo Soares Martins
