COVALIMA, 19 Novembru 2024 (TATOLI) – Departamentu Pekuária, Servisu Munisipál Agrikultura Covalima, laiha karreta atu tulun tékniku sira hala’o serbisu vasinasaun ba animál iha postu administrativu sira, nune’e sira uza de’it motorizada privada.
Xefe Departamentu Pekuária Covalima, Urbano Suri, dehan tékniku Pekuária sira presiza transporte atu fasilita sira-nia atividade hodi la’o tama-sai iha postu administrativu sira atu vasina karau no asu.
“Ami laiha transporte, nune’e bainhira hala’o atividade vasina animál uza de’it motorizada privadu. Ami fahe de’it grupu no ami mós la kobre to’o iha suku balun”, Urbano Suri dehan, iha Tabakolot ohin.
Tékniku Pekuária Covalima hamutuk 19, husi númeru ne’e na’in-ualu mak uza motorizada Estadu, na’in-11 uza de’it motór privada hodi hala’o atividade vasina karau no asu.
Vasinasaun ne’e tékniku sira hala’o de’it iha postu administrativu tolu hanesan Tilomar, Zumalai no Suai. Ba postu haat seluk seidauk halo vasinasaun, tanba tékniku pekuária hasoru difikuldade ba falta transporte atu hala’o serbisu iha terrenu
“Ami la’ós lakohi kobre postu haat seluk ne’ebé pertense ba Covalima, maibé presiza iha transporte atu ita hala’o serbisu iha terrenu. Se laiha transporte oinsá mak ita bele kobre to’o postu sira seluk”, nia dehan.
Tuir dadus, karau rihun 5 mak tama alvu ba vasinsaun no husi númeru ne’e vasina ona 1.249. Iha postu administrativu Tilomar vasina ona karau 476, Zumalai 416 no Suai 357.
Notísia relevante: Tékniku sira vasina ona karau rihun-resin iha Covalima
Jornalista: Celestina Teles
Editora: Maria Auxiliadora
