COVALIMA, 19 Novembru 2024 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hamutuk ho nia ekipa partilla informasaun kona-ba atividade toponímia no dekretu-lei númeru 33/2008 kona-ba Ijiene no Orden Públika. Iha atividade ne’e orienta diretór munsipál sira implementa lei ne’e.
“Ha’u mai atu ko’alia ho diretór servisu munisipál sira kona-ba dekretu-lei númeru 33/2008 ne’ebé implementa ona iha tinan kotuk iha primeira alterasaun númeru 3 janeiru 2024. Ha’u mai atu haree situasaun reál iha terrenu, ita-boot sira halo serbisu ka la’e? Realidade ha’u tesik mai Zumalai seidauk implementa hodi kontrola animál sira”, Germano Santa Brites dehan iha salaun AMC, ohin.
Governante ne’e fó atensaun ba diretór munisipál sira iha Covalima atu fahe informasaun kona-ba dekretu-lei númeru 33/2008, nune’e bele hala’o serbisu iha terrenu.
Aleinde ne’e, nia husu Diretora Jestaun Merkadu no Turizmu, Teresa Pires, tenke barani hala’o serbisu iha terrrnu, tanba realidade hatudu bainhira Sekretáriu Estadu halo viajen karau movimenta iha estrada no presiza atu informa ba karau-na’in sira atu lori animál ne’e bá iha nia fatin. Sujere mós bainhira Jestaun Merkadu Covalima atu kontrola animál sira tenke halo koordenasaun ho Polísia Nasionál Timor-Leste (PNTL) Covalima.
“Ita la bandu komunidade haki’ak animál hodi sustenta família, maibé komunidade muda animál iha nia fatin, nune’e labele impede movimentu transporte públiku hodi fó risku ba ema nia vida, di’ak liu hadomi ema duké hadomi animál, bainhira la koopera oho”, nia afirma.
Membru Governu ne’e salienta katak SEATOU sobu uma iha Dili ne’e sai ezemplu atu Servisu Jestaun Merkadu no Turizmu hala’o nia knaar hodi kontrola animál movimentu iha estrada no oho hafoin halo ata entrega ba orfonatu sira no la presiza fó ba PNTL no F-FDTL no ba prizaun, tanba sira hetan benefísiu husi Governu.
Atu implementa Lei Ordem Públika, liña ministeriál sira serbisu hamutuk, nomós presiza forma ekipa konjunta ida iha munisípiu, nune’e bele hadi’a munisípiu rasik.
Nia dehan aleinde kontrola animál, haree mós vendedór sira ne’ebé fa’an sasán atu labele okupa espasu públiku, nune’e transporte públiku halo movimentu labele hetan asidente hanesan xoke sidadaun sira ne’ebé fa’an sasán hanesan modo-tahan no mina iha estrada ninin.
“Diretór munisipál asume knaar atu hala’o serbisu, la’ós prodús lei tau iha gaveta, bainhira lee lei no komprende atu aplika”, nia subliña.
Iha sorin seluk, Sekretáriu Munisipál Planeamentu, Investimentu no Dezenvolvimentu Integradu, Caetano dos Santos Ribeiro, dehan autoridade Covalima prontu halo kontrolu ba vendedór sira ne’ebé okupa espasu públiku.
“Ohin, sekretáriu estadu ho nia ekipa mai iha Covalima ho objetivu mak atu haree espasu públiku. Timoroan okupu valeta to’o estrada ninin sira. Ita hotu hatene no sente SEATOU nia prezensa ho laran-taridu, tanba ita akompaña notísia iha televizasaun”, dehan.
Notísia relevante: SEATOU sobu barraka no fahi-luhan iha merkadu Maliana Vila
Jornalista: Celestina Teles
Editora: Maria Auxiliadora
