OÉ-CUSSE, 19 Novembru 2024 (TATOLI) – Suspeitu ba kazu omisídu iha suku Bene-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA) oras ne’e kumpre ona prizaun preventiva iha Becora.
Koordenadór Defensór Públiku Oé-Cusse, Afonso Gomes Fátima, ne’ebé fó asisténsia ba supeitu hateten katak iha primeiru interrogatóriu hatudu indísu forte katak arguidu mak oho vítima Belarmino Oba nu’udar maun rasik.
Nia hateten, durante julgamentu iha Tribunál Primeira Instánsia Oé-Cusse, arguidu uza nia direitu atu ko’alia, maibé nia nonook de’it no kazu ne’e ein flagrante delitu, tanba bainhira ne’e akontese ema balun halo persegisaun akompaña arguidu.
Nune’e mós suspeitu rasik bá entrega aan iha PNTL Eskuadra Nítibe, depois lori kedas bá Komandu PNTL Oé-Cusse hodi kumpre sela detensaun durante oras 72 hafoin enkamiña ba primeiru interrogatóriu.
“Iha primeiru interrogatóriu ne’e atu hatene katak iha indísu forte vítima mate tanba nia mak oho. Segundu, atu aplika medida koasaun, tanba iha indísu forte no krime ne’e mós kastigu husi tinan ualu to’o 20, depois konjugadu ho lei arma branka, entaun nia prienxe kedas rekizitu ba prizaun preventiva hodi hein prosesu investigasaun tuirmai”, Afonso Gomes Fátima informa ba jornalista sira iha Oé-Cusse, ohin.
Iha sorin seluk, Komandante PNTL Oé-Cusse, Superintendente Polísia Nicolau Francelino da Costa, adianta arguidu kumpre prizaun preventiva durante fulan neen iha Bekora hodi hein julgamentu.
Notísia relevante: Tribunál Oé-Cusse rejista kazu pendente 492, maioria kontrabandu
“Kazu ne’e agora hetan ona desizaun finál husi tribunál, katak arguidu [tama] prizaun preventiva, ne’ebé iha domingu hodi bainrua Komandu PNTL, liuhusi Servisu Investigasaun Kriminál akompaña detidu lori ona bá iha prizaun Bekora hodi kumpre durante fulan neen”, nia informa.
Rekorde katak kazu omisídu ne’e akontese iha loron 12 Novembru pur volta tuku 21:30 kalan iha vítima no suspeitu nia aman rasik nia uma, iha aldeia Lamasin, suku Bene-Ufe, sub-rejiaun Nítibe. Ne’ebé arguidu ho inisiál FSO (28) oho nia maun rasik Belarmino dos Santos Ona (30).
Belarmino dos Santos Oba nia mate-isin oras ne’e sei tau hela iha mortuáriu Ospitál Referénsia Oé-Cusse hodi hein prosesu autópsia.
Notísia relevante: Alin oho maun iha suku Bene-Ufe
Jornalista: Abílio Elo Nini
Editora: Maria Auxiliadora
