OÉ-CUSSE, 20 Novembru 2024 (TATOLI) – Komandu Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), preparadu asegura komemorasaun Loron Proklamasaun Independénsia 28 Novembru ne’ebé realiza iha Oé-Cusse.
“Tinan ne’e, Oé-Cusse sai uma-na’in ba selebrasaun 28 Novembru. Ita hotu hakarak loron istóriku ne’e tenke la’o iha ambiente ida pás nian. Kona-ba membru ita bele dehan katak la sufisiente, maibé husi parte komandu ami iha ona preparasaun, klaru atividade ne’e kompeténsia Governu sentrál, maibé la taka dalan ba Komandu PNTL RAEOA ami mós prepara ona ami-nia planu operasaun seguransa”, Komandante PNTL Oé-Cusse, Superintendente Polísia Nicolau Francelino da Costa, dehan.
Dirijente PNTL ne’e informa katak PNTL Oé-Cusse daudaun ne’e halo ona koordenasaun ba iha nasionál, nune’e iha tempu badak ekipa ida sei to’o uluk iha Oé-Cusse.
“Komandu PNTL Oé-Cusse la’ós mesak mak halo operasaun, maibé hetan mós apoia husi Komandu Jerál tanba sira tama iha forsa parada, ne’ebé PNTL Oé-Cusse nia servisu liga ho forsa destakadu seluk hanesan BOP, UPM, UPF. Ami prontu atu asegura, mezmu ho númeru ne’ebé ki’ik, maibé PNTL Oé-Cusse prontu no preparadu”, nia garante.
Totál membru efetiv iha komandu rejionál Oé-Cusse hamutuk na’in-130, maibé iha membru balun ho kondisaun moras no halo hela tratamentu médiku iha instalasaun saúde no seluk ne’ebé kondisaun di’akkontinua hala’o serbisu.
Notísia relevante: Kampu 01 de Maio Palaban fatin ba komemorasaun 28 Novembru
“PNTL daudaun prepara hela planu internál komandu nian, maibé preparasaun inísiu ne’e ami hala’o tiha ona liña koordenasaun ho F-FDTL destakadu Oé-Cusse atu asegura di’ak liután ita-nia Loron Proklamasaun 28 Novembru iha Oé-Cusse”, dehan.
Jornalista: Abílio Elo Nini
Editora: Maria Auxiliadora
