DILI, 20 novembru 2024 (TATOLI)—Prezidente Parlamentu Nasionál (PPN), Maria Fernanda Lay, hato’o agradesimentu ba partisipasaun deputadu sira-nia durante debate proposta Orsamentu Jerál Estadu (OJE) 2025 iha loron hirak nia laran no ohin konklui ona aprovasaun iha finál globál.
Notísia Relevante: PN aprova proposta OJE 2025 biliaun $2,6 iha finál globál ho votu afavór 42
“Agradese, Deputadu hotu konsege debate orsamentu ne’e to’o rohan tuir kalendáriu ne’e termina, hamutuk venceremos,” PPN hato’o iha sala plenária PN, hafoin PN aprova proposta-lei OJE 2025 ho montante biliaun $2,6 iha finál globál, kuarta ne’e.
Líder másimu órgaun soberania daruak ne’e husu deputadu sira hotu atu akompaña no halo fiskalizasaun atu Governu gasta ou ezekuta orsamentu povu ho didi’ak.
Nune’e, nia dehan, hanesan Primeiru-Ministru (PM) dehan nune’e PN prepara aan halo debate kada fulan tolu-tolu halo PN sai forte liután.
Nia husu, komisaun C atu halo redasaun finál ba proposta-lei OJE 2025 hodi bele envia ba Prezidente Repúblika (PR) mak iha kompeténsia eskluziva atu promulga.
Entretantu, PN ohin, liuhusi reuniaun plenária estraordináriu aprova proposta-lei númeru 12/VI(2a) Orsamentu Jerál Estadu (OJE) ba 2025 ho montante biliaun $2,6 ho votu afavór 42, kontra 23 husi bankada FRETILIN no PLP no abstensaun 0.
Notísia Relevante: PN husu Governu ezekuta OJE 2025 ba povu nia moris di’ak
Jornalista : Nelson de Sousa
Editór : Cancio Ximenes
