COVALIMA, 20 Novembru 2024 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hamutuk ho Diretora Servisu Munisipál Jestaun Merkadu no Turizmu, Teresa Pires, observa direta negosiante sira fa’an sasan ne’ebé okupa espasu públiku iha merkadu Debos.
“Ha’u mai haree espasu públiku iha merkadu Debos laran nomós ita-nia vendedór fa’an mina no loja sira okupa espasu públiku. Ita ko’alia ho sira, nune’e sira labele fa’an sasán okupa estrada públiku”, Germano Santa Brites dehan ohin.
Governante ne’e ko’alia ho vendedór sira atu sira rasik mak iha konxiénsia muda sasán fa’an iha merkadu laran atu labele okupa espasu públiku, nune’e transporte públiku no privadu livre halo movimentu.
SEATOU mós fó hanoin ba vendedór sira soe lixu iha nia fatin no negosiante sira tenke hamoos valeta, nune’e bainhira udan bee la’o tuir nia dalan atu labele hamosu dezastre naturál hanesan inundasaun.
Vendedór merkadu Debos Oscar Moniz Lobato dehan hanesan timoroan prontu koopera ho SEATOU no bainhira orienta labele fa’an sasán iha espasu públiku sei kumpre
“Ha’u prontu atu koopera, maibé durante ne’e ha’u mós selu taxa hahú iha 2012 to’o ohin loron, ne’ebé kada fulan ha’u selu $2.50 ba kofre Estadu. Ha’u selu iha Banku Nasionál Ultramarinu”, nia dehan.
Tuir dadus, rejista vendedoriha merkadu Debos, iha postu administrativu Suai hamutuk 100-resin.
Notísia relevante: SEATOU orienta diretór munisipál Covalima implementa Dekretu-Lei Ijiene no Orden Públika
Jornalista: Celestina Teles
Editora: Maria Auxiliadora
