DILI, 21 novembru 2024 (TATOLI)–Jerente Reitór Institute of Bussiness (IOB) la konkorda ho sujestaun husi Ministériu Ensinu Superiór Siénsia no Kultura (MESSK) kona-ba hamenus propina.
“Ami la simu sujestaun ida-ne’e husi MESSK. Hanesan instituisaun privadu ami iha ideia kompletu rasik atu deside montante propina tuir oferta formativa, ne’ebé ami haree ba kondisaun no kualidade edukasaun,” Reitór IOB, Pedro Ximenes, hateten via telefónika, kinta ne’e.
Notísia relevante : IOB haruka tan dosente 15 kontinua estudu iha nasaun tolu
Nia dehan, sei laiha mudansa husi sujestaun sira, tanba konsidera aplikasaun propina daudaun ne’e asesível ona ba estudante sira.
“Ami sei mantein ami-nia propina iha nível ne’ebé asesível ba estudante sira. Ami mós oferese bolsa estudu barak ba estudante sira ne’ebé mai husi munisípiu no área rurál. Iha IOB Maliana, kustu propina asesível tebes ho valór $60 ba semestre ida. Ne’e duni ami sente ami koloka ona meiu oin-oin atu ajuda estudante sira,” nia akresenta.
Antes ne’e, Ministru Ensinu Superiór Siénsia no Kultura, José Honório da Costa Pereira Jerónimo, husu estabelesimentu ensinu privadu sira atu redús propina ba estudante sira.
“Tinan oin ita sei kontinua subvensaun públika ba universidade privada sira hotu, ba buat tolu, ajuda ba profesór, ajuda estudante no ajuda mós atu promove formasaun língua portugueza, maibé favór ida estudante sira selu ne’e bele, maibé hamenus uitoan, tanba ha’u rona universidade balun selu karun tebes,” Ministru hato’o iha Hotel Timor, Colmera.
Jornalista : Osória Marques
Editora : Julia Chatarina
