DILI, 21 novembru 2024 (TATOLI) – Primeiru-Ministru, Kay Rala Xanana Gusmão, kinta ne’e, hasoru malu ho Prezidente Repúblika, José Ramos Horta, kona-ba prosesu diskusaun Orsamentu Jerál Estadu (OJE) 2025 ne’ebé pasa ona iha Parlamentu Nasionál.
“Enkontru semanál ho Prezidente Repúblika, ha’u informa kona-ba orsamentu 2025 nian liu ona, semana mai ne’e Prezidente bele promulga ona orsamentu ne’e,” PM Xanana hatenen.
Nia dehan, durante tinan 2025 Governu sei halo servisu maka’as tuir orsamentu ne’ebé iha ona maibé servisu hotu sei halo ho kualidade.
“Ha’u sei la’o haleu kada munisipiu fulan tolu-tolu atu kontrola servisu ne’ebé membru Governu sira halo atu fó hanoin ba malu nafatin, ha’u mós ko’alia ona ba Parlamentu Nasionál sira halo fiskalizasaun bebeik, karik buat ruma ami la halo bele bolu ami hodi husu tansa ami la halo, karik halo la di’ak bolu ami ba responde para ita hotu haree hamutuk ba nasaun no povu nia di’ak,” Xefe Governu kompromete
Aleinde ne’e líder na’in-rua ne’e ko’alia mós kona-ba preparasaun ba selebrasaun 28 Novembru ne’ebé sei hala’o iha Oé-Cusse semana mai ne’e. Iha ne’ebé sei partisipa mós husi bainaka balun husi Indonézia.
“Prezidente husu kona-ba preparasaun 28Novembru nian, ita sei iha bainaka sira hosi Indonézia hanesan ita nia maun alin sira husi NTT, ita simu sira atu partisipa iha selebrasaun ne’e, Prezidente Indonézia mak sei la partisipa no nia sei haruka nia reprezentante balun mai, nia sei mai fali iha tinan oin hanesan ne’e,” nia hakotu.
Jornalista: Hortencio Sanchez
Editór: Florencio Miranda Ximenes
