DILI, 21 novembru 2024 (TATOLI)-Parlamentu Nasionál (PN), sei envia proposta-lei númeru 12/VI(2a) Orsamentu Jerál Estadu (OJE) 2025 ho montante billaun $2,6 ba Prezidente Repúblika (PR), iha segunda (segunda 25 novembru 2024) semana oin hodi bele halo promulgasaun.
Notísia Relevante: https://tatoli.tl/2024/11/21/komisaun-c-aprova-redasaun-final-proposta-lei-oje-2025/
“Ita-boot sira akompaña horisehik ami halo ona aprovasaun redasaun finál no lorokraik ne’e ami komisaun C haruka mai iha gabinete Prezidente Parlamentu nian, maibé ami foin reuniaun ho Prezidente Parlamentu katak to’o sesta (22 novembru) ne’e, Prezidente seidauk haruka ba PR hodi halo promulgasaun. Tuir plan,u segunda semana oin mak foin haruka ba Prezidente Repúblika,” Prezidente Komisaun C trata asuntu Finansa Públika iha PN, Cedelizia Faria dos Santos, informa ba jornalista sira iha resintu PN, sesta ne’e.
Tanba, nia dehan, husi parte komisaun C haruka redasaun finál proposta-lei orsamentu ne’e iha gavinete Prezidente Parlamentu iha nia asesór sira tenke haree fila-fali hafoin emprime dekretu.
Nune’e, tuir planu iha semana oin Prezidente Parlamentu Nasionál, Maria Fernanda Lay, sei lori no entrega direta dekretu Parlamentu kona-ba OJE 2025 ba Prezidente Repúblika (PR).
Tuir lei, bainhira entrega ona ba PR iha prazu loron 30 hodi bele hetan promulgasaun ka veta ne’e kompeténsia eskluziva Xefe Estadu nian.
“Maibé, ha’u fiar Prezidente Repúblika sei promulga iha tempu badak,” nia hateten
Entretantu, PN liuhusi reuniaun plenária estraordináriu, iha 20 novembru ne’e, aprova proposta-lei númeru 12/VI(2a) Orsamentu Jerál Estadu (OJE) 2025 ho montante billaun $2,6 iha finál globál ho votu afavór 42, kontra 23 husi bankada FRETILIN ho PLP no abstensaun 0.
Jornalista : Nelson de Sousa
Editór : Cancio Ximenes
