OÉ-CUSSE, 21 Novembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretaria Rejionál ba Asuntu Administrasaun, planeia atu koloka, iha 2025, pontu fokál iha sub-rejiaun Oésilo, Pássabe, Nítibe no Pante Makasar hodi apoia halo advokasia ba asuntu feto sira-nian.
“Tinan ne’e ita prevee ona nia orsamentu iha planu asaun anuál 2025 atu rekruta pontu fokál feto iha kada sub-rejiaun sira”, Sekretáriu Rejionál ba Asuntu Administrasaun, André Lao, informa iha ámbitu konferénsia munisipál Rede Feto Timor-Leste, iha Otél Ambeno, ohin.
Knaar husi pontu fokál sira-ne’e nu’udar reprezenta rede feto iha área rurál, tanba iha sub-rejiaun sira to’o oras ne’e seidauk iha rede feto ida atu halo advokasia no fó atendimentu ba feto sira iha aspetu hotu tantu família, sosiál, ekonomia komu polítika.
Notísia relevante: PNTL rejista kazu violénsia doméstika aas iha Oé-Cusse
“Importante liu mak atu tau matan ba violénsia doméstika feto nian, tanba durante ne’e akontese dala barak. Bainhira akontese iha área rurál, família balun ladún hetan asesu ba protesaun, tanba koñesimentu ladún másimu. Tanba ne’e, autoridade kria polítika ida tenke destaka focal point feto iha baze atu sai hanesan defeza ba inan-feto sira, bainhira akontese buat ruma bele asesu ho distánsia besik”, nia dehan.
Liga ba asuntu ne’e, Koordenadora Asosiasaun Feto ba Mudansa Ekonomia Família (AFMEF), Joana Bobo Tanu, konkorda ho polítika autoridade atu koloka pontu fokál feto nian iha kada sub-rejiaun sira.
“Ida-ne’e sai hanesan ponte ida oinsá atu lori grupu ne’ebé agora sei hala’o sira-nia atividade iha área rurál bele pasa informasaun mai sub-rejionál ka sentru protesaun sira iha Oé-Cusse Vila. Ami konkorda tanba karik monta pontu fokál kada sub-rejiaun, parte ida kontribui ba redús violénsia doméstika, tanba iha observa kazu barak durante ne’e akontese no barakliu daudaun seidauk rezolve”, nia afirma.
Notísia relevante: Autoridade RAEOA-FPWO selebra MoU kombate violénsia doméstika iha Oé-Cusse
Rekorde katak, iha 2023, Komandu Polísia Nasionál Timor-Leste (PNTL) Oé-Cusse rejista kazu 262 no maioria mak violénsia doméstika
Jornalista: Abílio Elo Nini
Editora: Maria Auxiliadora
