DILI, 22 novembru 2024 (TATOLI)— Ministériu Edukasaun (ME) liuhusi Diresaun Nasionál Rekursu Umanu husu ba profesór rekrutadu husi vaga bolsa kandidatu, atu halo reklamasaun ba ME bainhira saláriu no subsídiu seidauk tama iha ida-idak nia konta bankária.
“Informa ba profesór sira husi prosesu kolokasaun dahuluk no daruak, karik saláriu no subsídiu sira seidauk tama iha konta bankária, husu atu informa lalais mai Ministériu Edukasaun liuhusi Diresaun Nasionál Rekursu Umanu hodi haree tuir fali prosesu ne’e,” Diretora Rekursu Umanu iha ME, Anita Tavares, hato’o iha salaun ME, Villa-Verde, sesta ne’e.
Notísia relevante : Edukasaun Manatuto koloka ona profesór bolsa kandidatu 29 ba eskola 15
Iha kolokasaun profesór faze dahuluk no daruak husi vaga bolsa kandidatu faze dahuluk konsege halo pagamentu hotu ona inklui saláriu mensál husi loron 14 maiu.
“Subsídiu kolokasaun inisiál no subsídiu transporte prosesa no halo ona pagamentu iha fulan-novembru no osan tama ona ba ida-idak nia konta bankária,” nia akresenta.
Diretora husu ba profesór sira kolokadu iha faze daruak atu aselera prosesu submisaun lista prezensa kada fulan mai Diresaun Nasionál Rekursu Umanu, ne’ebé asinadu husi Diretór eskola ida-idak husi eskola privada, eskola publika no Centro de Aprendizagem e Formação Escolar (CAFE).
“Nune’e mós ba profesór kolokadu iha faze datoluk tenke mós aselera ho lista prezensa kada fulan, labele liu loron 15 dezembru 2024. Pagamentu sei iha prosesu no sei tama iha fulan-dezembru,” Diretora fó sai.
Totál pagamentu saláriu baze ba profesór destakadu sira hamutuk millaun $1,1-resin, totál sub-inisiál $952.602 no subsídiu transporte $110.775.
Jornalista : Osória Marques
Editora : Julia Chatarina
