DILI, 22 novembru 2024 (TATOLI)–Ministériu Edukasaun (ME) propoin pagamentu ba kargu xefia sesante sira iha Orsamentu Jerál Estadu (OJE) tinan 2025 nian.
“Ami halo ezersísiu pagamentu ba kargu xefia, kompostu husi Koordenadór, Adjuntu, Diretór, GAT nia subsídiu no transporte. Ami agora halo hela kontajen no konforme orsamentu previstu, prosesu ne’e la’o hela. Nune’e, tinan 2024 ita prepara no propoin depois tinan 2025 bele paga,” Diretora Rekursu Umanu iha ME hateten iha ninia knaar fatin, ME, sesta ne’e.
ME iha tinan 2023 liubá halo ona pagamentu ba kargu xefia hamutuk 1.927 iha territóriu nasionál, ne’ebé númeru ne’e maihusi munisípiu Aileu 133, Ainaro 14, Baucau 459, Bobonaro 71, Covalima 326, Dili 244, Ermera 16, Liquiçá 18, Lautém 270, Manatuto 161, Manufahi 59 no Viqueque 156.
Notísia relevante : ME prefere selu kedan subsídiu ba kargu xefia foun
Enkuantu, iha tinan 2022 halo ona pagamentu hamutuk 2.306, kompostu husi munisípiu Aileu 98, Ainaro 151, Baucau 380, Bobonaro 115, Covalima 73, Dili 306, Ermera 47, Liquiçá 518, Lautém 308, Manatuto 94, Manufahi 113 no Viqueque 103.
Iha sorin seluk, Diretór Eskola Sekundária Jerál (ESJ) 04 Setembru Balide, Martinho de Menezes, hateten, durante tinan-ida ona kargu xefia sira seidauk simu subsídiu no orsamentu transporte, maibé lamenta tebes tanba ME halo ona pagamentu ba kargu xefia foun sira ne’ebé foin asume responsabilidade.
“Ami ladún kontente tanba lei ida ba subsídiu kargu xefia ne’e vigór iha loron 31 maiu 2023, tuir loloos ami hetan ona, maibé to’o ohin loron ami la hetan, agora kolega sira neʼebé foin tama subtitui ami ne’e hetan kedas pagamentu. Tanba ne’e mak ami ladún satisfaz, ne’ebé ami husu ba Ministériu Edukasaun liuhusi Rekursu Umanu atu esplika took mai ami katak nia problema ne’e iha ne’ebé mak ami-nia seidauk hetan pagamentu,” Diretór eskola hato’o lamentasaun iha edifísiu ME, Villa-Verde, kuarta ne’e.
Jornalista : Osória Marques
Editora : Julia Chatarina
