COVALIMA, 22 Novembru 2024 (TATOLI) – Ministru Obra Públika, Samuel Marçal, akompaña husi Vise-Ministru, Júlio do Carmo, no Prezidente Autoridade Covalima, Miguel Armada Cardoso, lansa fatuk dahuluk ba konstrusaun ponte Mali-Loek ne’ebé lokaliza iha aldeia Sanfuk, suku Camnasa, postu administrativu Suai.
“Ita hotu akompaña, kuaze tinan hirak bá kotuk, ita-nia dezenvolvimentu la funsiona. Ha’u la’o iha Timór laran tomak ponte barak kotu no estrada aat, ida-ne’e mak Governu nia responsabilidade oinsá atu rezolve”, Samuel Marçal hato’o iha nia diskursu, ohin.
Governante ne’e husu ba empreza Djeje Oal Unipessoal Lda atu konstrui ponte ho kualidade no labele haree ba orsamentu, tanba ida-ne’e hanesan fó oportunidade ba empreza atu aprende hodi kontribui ba dezenvolvimentu iha Timor-Leste.
Nia salienta katak polítika Governu nian mak atu dudu no fó oportunidade ba setór privadu sira, nune’e dezenvolve nasaun.
Prezidente Autoridade Covalima, Miguel Armada Cardoso, hateten konstrusaun ponte Mali-Loek ne’e bele fasilita komunidade halo movimentu ho transporte publiku no privada.
“Tinan barak ita hotu hein no kada tinan komunidade sempre partilla informasaun kona-ba kondisaun ponte Mali-Loek Sanfuk ne’ebé difísil halo movimentu bainhira iha tempu udan. Ohin loron ita haksolok lansa fatuk dahuluk ba konstrusaun ponte”, nia dehan.
Diretora empreza Djeje Oal Unipessoal Lda, Maria Lúcia Aleixo Ferreira, informa orsamentu ba kontrusaun ba ponte Mali Loek Sanfuk hamutuk $1,119.530,98 ne’ebé tuir kontratu obra ne’e sei halo durante fulan ualu.
“Ami garante katak empreza iha kompromisu atu serbisu ho kulidade tuir BoQ”, nia promete.
Tuir planu, empreza sei kontrata traballadór na’in- 48, husi númeru ne’e estranjeiru na’in-10 no timor-oan na’in-38, ne’ebé sei serbisu hodi konstrui ponte ho naruk metru 40 no luan metru 9,6.
Notísia relevante: CNA loke konkursu públiku ba konstrusaun ponte Mali-Loek
Jornalista: Celestina Teles
Editora: Maria Auxiliadora
